Քաղաքականություն
17.10.2023 | 18:54
Եկել է ժամանակը, որ միջազգային հանրությունը լուրջ քայլեր ձեռնարկի երկու պետությունների սկզբունքի հիման վրա 1967 թվականի սահմաններով անկախ Պաղեստին պետություն ստեղծելու համար՝ Երուսաղեմ մայրաքաղաքով։ Այս մասին հայտարարել է Թուրքիայի ԱԳ նախարար Հաքան Ֆիդանը Բեյրութում իր լիբանանցի գործընկեր Աբդալլահ Բուհաբիբի հետ համատեղ մամուլի ասուլիսում, գրում է Անադոլու գործակալությունը։
«Տարիների ընթացքում հեգեմոն տերություններն օգտագործել են լրատվամիջոցների ազդեցությունը, որպեսզի մեզ մոռացնել տան պաղեստինյան խնդրի իրական էությունը, ժամանակն է վերջ դնել դրան»,- ասել է Ֆիդանը։
Նա նշել է, որ իսրայելա-պաղեստինյան հակամարտությունը կարող է վերածվել ավելի մեծ պատերազմի, բայց դա կարող է նաև պատմական հնարավորություն ստեղծել խաղաղության համար։ Ֆիդանն ընդգծել է, որ Անկարան ամեն ջանք գործադրում է իսրայելա-պաղեստինյան հակամարտության պատճառով տարածաշրջանի երկրների՝ առաջին հերթին Լիբանանի, Եգիպտոսի և Հորդանանի ապակայունացումը կանխելու համար։
Թուրք պաշտոնյան մեկնաբանել է նաև պաղեստինյան տարածքներում հրեական անօրինական բնակավայրերի կառուցումը։
«Ուրիշների հողերի և տների բռնագրավումը՝ նրանց բնակիչներին վտարելով, ոչ թե «բնակարանային գործունեություն» է, այլ գողություն։ Թուրքիան հզոր և փորձառու պետություն է՝ պատմական անցյալով։ Մենք ձեզ կոչ ենք անում ականջալուր լինել մեր նախազգուշացումներին»,- հայտարարել է Ֆիդանը։
Էմմա Չոբանյան
