ԱՄՆ-ն Իսրայելի և Իրանի միջև պատերազմի դեպքում բանակն օգտագործելու մասին օրինագիծ կմշակի

ԱՄՆ Կոնգրեսի Ներկայացուցիչների պալատը կմշակի օրինագիծ, որը թույլ կտա օգտագործել ԱՄՆ ռազմական ուժերը Իսրայելի և պաղեստինյան ՀԱՄԱՍ խմբավորման միջև պատերազմի սրման դեպքում, հայտարարել է Ներկայացուցիչների պալատի արտաքին հարաբերությունների հանձնաժողովի ղեկավար Մայքլ Մաքքոլը։

Նա, միաժամանակ, հույս է հայտնել, որ օրենքն ուժի մեջ մտնելու անհրաժեշտություն չի լինի։

«Հուսով եմ, որ երբեք ստիպված չեմ լինի ստորագրել այս օրինագիծը: Բայց մենք Մերձավոր Արևելքում իրավիճակ ունենք, որն օրեցօր վատանում է»,- CNN-ին տված հարցազրույցում ասել է Մայքլ Մաքքոլը։

Նա նշել է, որ հակամարտությունը Մերձավոր Արևելքում կարող է ընդլայնվել, եթե Իսրայելի պաշտպանության ուժերը (IDF) ցամաքային գործողություն սկսեն Գազայի հատվածում։ Լիբանանյան «Հըզբոլլահ» շարժումն ու Իրանն արդեն սպառնացել են այս դեպքում երկրորդ ճակատ բացել, ընդգծել է Մաքքոլը։

Հանձնաժողովի նախագահը պարզաբանել է, որ օրենքի նախագծում, ամենայն հավանականությամբ, Իրանը չի նշվի որպես հակամարտության կողմ։ Այն, հավանաբար, կներառի ՀԱՄԱՍ-ը, «Հըզբոլլահ»-ը, ինչպես նաև «Իրանի կողմից աջակցվող շիա աշխարհազորայինները»: Միաժամանակ, Մայքլ Մաքքոլն ընդգծել է, որ եթե իրանական բանակն անմիջական մասնակցություն ունենա հակամարտությանը, ապա նախագծում մի ամբողջ պետություն կավելանա։

Միաժամանակ, Մայքլ Մաքքոլը նշել է, որ ցանկացած նման օրինագիծ պետք է ստանա ամերիկյան հանրության աջակցությունը։

«Ես հիմա նախագիծ եմ պատրաստում, եթե դրա կարիքը լինի։ Բայց, որ ամենակարևորն է, այն պետք է ստանա ամերիկյան ժողովրդի աջակցությունը»,- հավելել է նա։

Իսրայելի և պաղեստինյան ՀԱՄԱՍ շարժման միջև պատերազմը շարունակվում է հոկտեմբերի 7-ից։ Միաժամանակ, լիբանանյան «Հըզբոլլահ»-ը հարվածներ է հասցնում նաև հյուսիսային Իսրայելին։ Թել Ավիվը հաղորդել է ավելի քան 1300 զոհվածների և հարյուրավոր պատանդների մասին, որոնք տարվել են Գազայի հատված: Պաղեստինյան կողմի տվյալներով՝ գնդակոծությունից զոհվել է 2,8 հազար մարդ։

Իրանի խորհրդարանը սպառնացել է միջամտել հակամարտությանը, եթե Իսրայելը ցամաքային հարձակում սկսի Գազայի հատվածում։ ԱՄՆ-ն, իր հերթին, զգուշացրել է Թեհրանին հակամարտությանը մասնակցելուց զերծ մնալու մասին։