Ընդդիմությունը պայքարի նոր փուլ կսկսի. Ազգային կոմիտեն հայտարարություն է տարածել․ ՏԵՍԱՆՅՈՒԹ

Ազգային կոմիտեն վերակազմակերպվում և ընդդիմադիր շարժման նոր ձևաչափ է սահմանում․ այս մասին այսօր հաղորդագրություն է տարածել ընդդիմադիր նախաձեռնությունը։ Հինգ հոգուց բաղկացած կոմիտեն այսօր քննարկում է ունեցել, որին, ըստ հաղորդագրության, մասնակցել են Հայաստանում գործող ընդդիմադիր քաղաքական-հասարակական ուժերի մի քանի տասնյակ ներկայացուցիչներ, անհատ հանրային գործիչներ։ Կոմիտեի ներսում քննարկում են կա՛մ ձևափոխել կոմիտեն, կա՛մ լուծարել և ստեղծել նորը՝ ներգրավելով նոր ուժերի։

Ազգային կոմիտեից մեզ փոխանցեցին, որ բոլոր 5 անդամները ներկա են եղել քննարկմանը։ Իշխան Սաղաթելյանը մեր հեռախոսազանգերին չպատասխանեց, իսկ մյուս անդամները հրաժարվեցին մեկնաբանություն տալ։

Ազգային կոմիտեն ձևավորվել էր Արցախի դեմ Ադրբեջանի սանձազերծած ագրեսիայի հաջորդ օրը՝ սեպտեմբերի 20-ին։ Ընդդիմությունը հայտարարում էր՝ մշակելու են գործողությունների ծրագիր, որի վերջնարդյունքը պետք է լինի կառավարության հեռացումը։ Իրականացնելով բողոքի տարբեր գործողություններ՝ փողոց փակելուց մինչև հանրահավաքներ, այդպես էլ չհայտարարվեց վարչապետի միասնական թեկնածուի մասին, միևնույն ժամանան, Վազգեն Մանուկյանը բացառել էր նախկին նախագահների թեկնածությունը։ Մանուկյանը, որը 2020-ին նախաձեռնված և հաջողության չհասած ՀՓՇ վարչապետի թեկնածուն էր, բացառել էր նաև իր թեկնածությունը։

Այսօր տեղի ունեցած քննարկման ժամանակ խոսելով խնդիրներից՝ Վազգեն Մանուկյանն առաջնային խնդիրը համարել է արցախահայության վերադարձն Արցախ, որտեղ բնակչությունը պետք է գտնվի ՄԱԿ-ի մանդատով միջազգային ուժի պաշտպանության տակ, ինչպես նաև Մինսկի խմբի աշխատանքների վերականգնումը՝ որոշելու Արցախի կարգավիճակը: Մանուկյանը, սակայն, չի բացահայտել, թե ինչպես են հասնելու այդ ամենին։

Ազգային կոմիտեն հայտարարում է՝ երկրորդ խնդիրը համահայկական ճակատ ստեղծելն է, որտեղ կներգրավվի ոչ միայն Հայաստանի բնակչությանը, այլև սփյուռքը, ազգային կառույցները։ Երրորդ խնդիր է սահմանվում Հայաստանում և սփյուռքում ազգային ուդ ռազմահայրենասիրական հոսանք ունենալը, չորրորդը՝ մարդկանց փողոց դուրս բերելն ու իշխանափոխություն կազմակերպելը։

Ինչպե՞ս են այս նպատակներն իրագործվելու՝ առայժմ պարզ չէ․ խոսվում է կոմիտեի ներսում գաղափարական տարաձայնությունների մասին։ Այդ խոսակցությունները տարածվեցին, երբ հետաձգվեց սեպտեմբերի 26-ին նախատեսված հանրահավաքը՝ հիմնավորմամբ, թե կոմիտեն լծվել է Արցախից բռնի տեղահանվածներին օգնելու գործին։

Սեպտեմբերի 30-ին տեղի ունեցավ ևս մեկ հանրահավաք, որի ընթացքում կոմիտեի կազմից ելույթներ ունեցան միայն Ավետիք Չալաբյանն ու Վազգեն Մանուկյանը։ Այդ օրը Մանուկյանը հայտարարեց՝ պիտի ավելացնել կոմիտեի անդամների թիվը և ստեղծել միասնություն։ Բայց դա կոմիտեի հրավիրած վերջին հանրավահաքն էր․ դրանից հետո բողոքի որևէ գործողություն չի իրականացվել։

Մանրամասները՝ տեսանյութում։

Արփի Հակոբյան