10.04.2026 | 19:27
Պուտինի վարկանիշը ՌԴ-ում ամենացածրն է 2022 թվականի փետրվարից ի վեր
ԱՄՆ-ը պատժամիջոցներ է սահմանել Թուրքիայի և ԱՄԷ-ի ընկերությունների դեմ՝ ռուսական նավթի փոխադրման համար
Քաղաքականություն
13.10.2023 | 15:51
ԱՄՆ-ն պատժամիջոցներ է սահմանել թուրքական Ice Pearl Navigation և ԱՄԷ-ից Lumber Marine SA ընկերության դեմ՝ սահմանված գնի վերին շեմի խախտմամբ ռուսական նավթ փոխադրելու համար։ Այս մասին հայտնում է ԱՄՆ Ֆինանսների նախարարությունը, որին վկայակոչում է currenttime.tv-ն։
Սահմանափակումները վերաբերում են Lumber Marine SA-ին պատկանող «Պրիմորիե» լցանավին, որը ռուսական նավթ էր տեղափոխում մեկ բարելի դիմաց 75 դոլարից բարձր գնով, ինչպես նաև Ice Pearl Navigation-ում գրանցված Yasa Golden Bosphorus լցանավին, որը նավթ էր տեղափոխում մեկ բարելի դիմաց ավելի քան 80 դոլարով։ Նավերի տերերն օգտվել են ամերիկյան ընկերությունների ծառայություններից, ինչը թույլ է տալիս նրանց մեղադրել պատժամիջոցները խախտելու մեջ։
Այս ընկերությունների ունեցվածքն արգելափակվել է, սահմանափակումների է ենթարկվում նաև ցանկացած կառույց, որը վերահսկում է պատժամիջոցների տակ գտնվող ընկերությունները։
Հավելենք, որ դեկտեմբերին նավթի մեկ բարելի դիմաց 60 դոլար գնի շեմը համաձայնեցվել էր G7 երկրների, ԵՄ-ի և Ավստրալիայի կողմից։
Էմմա Չոբանյան
