ԱԻՄ առաջնորդ Պարույր Հայրիկյանը Փանիկում կատարվածը արտառոց երևույթ չի համարում, քանի որ, ըստ նրա, կատարվածում արտառոցն այն էր, որ Ռուսաստանում հայտնվեցին ուժեր, որոնք իրենց պարտքը համարեցին սադրանք բառը վերադարձնել մեզ՝ սակայն այլ շեշտադրումով․ «ՌԴ-ից արձագանքեցին՝ սադրանքն այն է, որ դու լիարժեք մեր ստրուկը չես, ինչպե՞ս ես համարձակվում ուրիշների հետ հարաբերություններ պահպանել»։ Այս մասին այսօր լրագրողների հետ զրույցում ասաց ԱԻՄ առաջնորդը։
Խոսելով ներքաղաքական այլ զարգացումների մասին՝ ԱԻՄ առաջնորդը կարևորեց ընտրական գործընթացը և նշեց, որ ԱԻՄ-ն ընտրական համակարգի նկատմամբ ունի շատ լուրջ վերաբերմունք, հայեցակարգ են ներկայացրել առաջին փոխվարչապետին և սպասում են պատասխանին։ «ԱԻՄ-ի նախագահության մի քանի անդամներ, սակայն, արդեն ունեն դիրքորոշում՝ սատարել Զարուհի Փոստանջյանին»,- ասաց նա։
Պարույր Հայրիկյանը խոսեց նաև Կառավարության կադրային քաղաքականության մասին և շեշտեց․ «Ինձ համար անհասկանալի է մեծերին չպատվելու այս հետևողական գիծը և երեխաներին գայթակղելու հետևողական գիծը, երկուսն էլ ծանր մեղքեր են։ Էս Կառավարությունում չգիտեին Հրանտ Բագրատյանի տեղը, երբևէ լսել եք, որ Արա Պապյանին կանչեն, Րաֆֆի Հովհաննիսյանին կանչեն։ Բնապահպանական հարցերի հետ կապված լսե՞լ են արդյոք Հակոբ Սանասարյանին կամ Կարինե Դանիելյանին»։
Մանրամասները՝ տեսանյութում։
