30.05.2026 | 16:48
Հանրապետության տոնի առթիվ ՀՀ հակակոռուպցիոն կոմիտեի նախագահի հրամանով մի շարք ծառայողներ են պարգևատրվել
Երկկողմ հարաբերությունները դաշնակցային են․ Ալիևն ու Պատրուշևը քննարկել են նաև «3+3» ձևաչափը
Քաղաքականություն
11.10.2023 | 12:25
ՌԴ Անվտանգության խորհրդի քարտուղար Նիկոյալ Պատրուշևը նախօրեին հանդիպել է Ադրբեջանի նախագահ Իլհամ Ալիևի հետ։ Ըստ ադրբեջանական կողմի հաղորդագրության՝ Ալիևը հայտարարել է, որ երկու երկրների հարաբերությունների օրակարգը շատ լայն է։ Նա ասել է, որ Ադրբեջանի և Ռուսաստանի Դաշնության միջև դաշնակցային համագործակցության մասին հռչակագրի ստորագրումից հետո անցած ժամանակահատվածը ցույց է տվել, որ երկկողմ հարաբերություններն իսկապես դաշնակցային են, և ընդգծել է, որ դա դրսևորվում է բոլոր ոլորտներում։
«Ալիևը վստահություն է հայտնել տարածաշրջանային անվտանգության, տնտեսական, տրանսպորտային և այլ ոլորտներում համագործակցության հետագա ամրապնդման հարցում։ Նիկոլայ Պատրուշևն էլ առաջին հերթին փոխանցել է Ռուսաստանի Դաշնության նախագահ Վլադիմիր Պուտինի ողջույններն ու բարեմաղթանքները։ Նա նաև գոհունակությամբ ընդգծել է, որ Ադրբեջանի և ՌԴ-ի միջև դաշնակցային համագործակցության մասին հռչակագրի ստորագրումից հետո երկու երկրների կապերն էլ ավելի են ընդլայնվել։
Հանդիպմանը մտքերի փոխանակություն է տեղի ունեցել գլոբալ և տարածաշրջանային խնդիրների, ինչպես նաև միջազգային կազմակերպությունների շրջանակներում համագործակցության շուրջ, քննարկվել են տարածաշրջանային համագործակցության հարցեր, կարևորվել է «3+3» ձևաչափը։
Զրույցի ընթացքում նաև մտքերի փոխանակություն է տեղի ունեցել Ադրբեջանի, Ռուսաստանի և Իրանի միջև Հյուսիս-Հարավ տրանսպորտային միջանցքի զարգացման համագործակցության շուրջ»,- ասված է հաղորդագրության մեջ։
Պատրուշևը հանդիպել է նաև Ադրբեջանի Անվտանգության խորհրդի քարտուղար Ռամիլ Ուսուբովի հետ։ Կողմերը մտքեր են փոխանակել իրավապահ մարմինների ու հատուկ ծառայությունների համագործակցության, այդ թվում՝ թմրամիջոցների ապօրինի շրջանառության և կիբերհանցագործությունների դեմ համատեղ պայքարի շուրջ։
