13.03.2026 | 09:39
Ցիկլոնի ներթափանցմամբ պայմանավորված, առաջիկա օրերին, առանձին շրջաններում սպասվում է ձյուն, բուք, մերկասառույց
Ի՞նչ քայլեր է ձեռնարկում ԱԱԾ-ն արցախցիների՝ Հայաստան հոսքի ընթացքում ադրբեջանցիների հնարավոր ներթափանցումը բացառելու համար
Հասարակություն
29.09.2023 | 10:53
Արդեն 6-րդ օրն է՝ Արցախից բռնի տեղահանված քաղաքացիները Հակարիի կամրջով մուտք են գործում ՀՀ տարածք։ Մինչև տեղափոխման գործընթացը սկսելը Արցախում ակտիվորեն շրջանառվում էին խոսակցություններ, թե Ադրբեջանը արցախցի տղամարդկանց շուրջ 30 հզ-անոց ցուցակ է կազմել և պատրաստվում է նրանց չթույլատրել լքել Արցախը, սակայն մինչ այս պահը բազմաթիվ տղամարդիկ անխոչընդոտ անցել են անցակետը։ Արցախում բնակվող միակ անձը, որին անցակետում ադրբեջանցիների կողմից ձերբակալելու մասին հայտնի է դարձել, Արցախի նախկին պետնախարար Ռուբեն Վարդանյանն է։
Հակարիի կամրջով Հայաստան տեղափոխվող տեղահանված անձինք պատմում են, որ ադրբեջանական անցակետում իրենց անձնագրերը գրեթե չեն ստուգում։ Այս իրավիճակում հնարավոր չէ բացառել, որ անցակետով կարող են Հայաստան անցնել նաև ադրբեջանական հատուկ ծառայությունների գործակալներ կամ ադրբեջանցիներ։
ԱԱԾ-ից փորձեցինք պարզել, թե ԱԱԾ-ն անվտանգություն ինչ միջոցներ է ձեռնարկում՝ արցախցիների Հայաստան հոսքի ընթացքում ադրբեջանցիների հնարավոր ներթափանցումը բացառելու համար
«ԱԱԾ-ն իրեն վերապահված լիազորությունների շրջանակներում ձեռնարկում է բոլոր հնարավոր միջոցառումները նման դեպքերը կանխելու համար»,- հայտնեցին ԱԱԾ լրատվական ծառայությունից՝ մանրամասներ չհայտնելով։
Նշենք, որ տեղահանված արցախցիներից այս օրերին դժգոհություններ են հնչել, որ ադրբեջանցիներից առավել մանրազնին ՀՀ անցակետում են իրենց ստուգում։ Ենթադրվում է, որ սա արվում է հենց հնարավոր ներթափանցման դեպքերը կանխելու և անվտանգության նկատառումներով
