30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵԿՄ նախկին փոխնախագահ Ալբերտ Բազեյանը կալանավորվեց
Հասարակություն
26.09.2023 | 12:12
Երևանի նախկին քաղաքապետ, ԵԿՄ նախկին փոխնախագահ Ալբերտ Բազեյանը երկու ամսով կալանավորվել է։ Այս մասին Factor TV-ի հետ զրույցում ասաց նրա պաշտպան Գեորգի Մելիքյանը։ «Պարոն Բազեյան շատ ծանր է ընդունում մեղադրանքը»,- նշեց փաստաբանը։
Երեկ Ազգային անվտանգության ծառայությունը հաղորդագրություն տարածեց, որ Բազեյանն ու «Խաչակիրներ» ռազմահայրենասիրական կազմակերպության ձերբակալված 7 անդամները ձեռք են բերել հեռահաղորդակցության սարքեր, հեռախոսային ու այլ կապը խլացնող սարքեր, ստեղծել պայմաններ իշխանությունը յուրացնելու համար, բայց իրենց կամքից անկախ հանցագործությունն ավարտին չեն հասցրել։
Թեև, ԱԱԾ-ն չի մանրամասնում մեղադրանքն ամբողջությամբ, սակայն մեղադրանքի ձևակերպումներում նշվում է, որ պլանավորվել է իշխանությունը յուրացմանը հասնել ընդհուպ կառավարության ղեկավարին և անդամներին կյանքից զրկելու միջոցով։
«Մեղադրանքն ամբողջովին անհիմն է, բայց նախ մենք միանշանակ կբողոքարկենք ընտրված խափանման միջոց կալանքը»,- նշեց պաշտպան Մելիքյանը։
Հիշեցնենք՝ սեպտեմբերի 23-ին հայտնի դարձավ, որ ԱԱԾ քննիչները մտել են Բազեյանի բնակարան և խուզարկություն կատարել։ Ավելի ուշ, նրան ձերբակալեցին և մեղադրանք առաջադրեցին ՀՀ Քրեական օրենսգրքի 43-419-րդ հոդվածով (իշխանությունը յուրացնելը) նախատեսված արարք կատարելու կասկածանքով:
Ռոզա Վարդանյան
