16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Առաջինը ՌԴ խաղաղապահ ուժերը պետք է միջոցներ ձեռնարկեն, երկրորդը՝ ՄԱԿ-ի ԱԽ-ն․ Փաշինյանը՝ Արցախում իրադրության մասին․ ՏԵՍԱՆՅՈՒԹ
19.09.2023 | 16:37
Ժամը 13:00-ի սահմաններում Ադրբեջանի ԶՈՒ-ն սկսել է ԼՂ-ի ամբողջ տարածքի հրետակոծություն, որոշ ժամանակ անց սկսել է գործողությունը ԼՂ-ի շփման գիծը խախտելու և ԼՂ-ում դիրքեր, որոշ ուղղություններով էլ նաև բնակավայրեր իրենց վերահսկողության տակ վերցնելու նպատակով: Այս մասին հայտարարեց ՀՀ վարչապետ Նիկոլ Փաշինյանը՝ ուղիղ եթերով անդրադառնալով Արցախի Հանրապետության նկատմամբ Ադրբեջանի ագրեսիային։
Վարչապետը տեղեկացրեց, որ Հայաստանը կապի մեջ է Լեռնային Ղարաբաղի հետ:
«Սկզբից ամենատարբեր, այդ թվում՝ ռեակտիվ հրետանային միջոցներով, հարվածներ են հասցրել ԼՂ տարածքին, այնուհետև մի քանի ուղղությունից ցամաքային գործողություն սկսել ընդդեմ ԼՂ-ի․․․
Տարօրինակ և տարակուսելի էր տեղեկությունը, որ Ադրբեջանն այդ գործողությունների մեկնարկի մասին պաշտոնապես տեղյակ է պահել ՌԴ-ին: Իհարկե, սա Ադրբեջանի վարկածն է, տեղեկատվությունն է, սակայն փաստն այն է, որ մենք գոնե այդ գործողության մասին ՌԴ մեր գործընկերներից որևէ տեղեկատվություն չենք ստացել»,- ասաց վարչապետը:
Փաշինյանը նաև ընդգծեց, որ իրադրությունն անկանխատեսելի չէր, Կառավարության նիստերի ընթացքում էլ ասել է, որ ՀՀ պետական սահմանին և ԼՂ շփման գծի երկայնքով նկատելի է լարում:
«Երեկ Ադրբեջանի ԱԳՆ-ում տեղի ունեցած հանդիպումը Ադրբեջանում հավատարմագրված դիվանագիտական ներկայացուցիչների հետ ԼՂ-ի դեմ ռազմական գործողությունների դիվանագիտական նախապատրաստությունն էր, և դա արդարացվեց։
Անվտանգության խորհրդի ընդլայնված նիստ ենք հրավիրել, քննարկել ենք իրադրությունը. պետք է արձանագրենք, որ այսպիսով Ադրբեջանը մեկնարկել է ԼՂ-ի հայությանը էթնիկ զտումների ենթարկելու ցամաքային օպերացիան։
Մենք կարծում ենք, որ առաջինը ՌԴ խաղաղապահ ուժերը պետք է միջոցներ ձեռնարկեն և երկրորդ, ակնկալում ենք, որ ՄԱԿ-ի Անվտանգության խորհուրդը պետք է միջոցներ ձեռնարկի», – հայտարարեց Փաշինյանը։
Մանրամասները՝ տեսանյութում։
