20.06.2026 | 16:14
Էբոլայի հետ կապված իրավիճակն աշխարհում․ 875 հաստատված դեպք, 204 մահ
Ադրբեջանը հայտարարել է Արցախում «հակաահաբեկչական օպերացիա» իրականացնելու մասին․ ռուս խաղաղապահները տեղեկացված են
Քաղաքականություն
19.09.2023 | 13:46
Ադրբեջանի Պաշտպանության նախարարությունը հաղորդագրություն է տարածել, որով հայտարարել է Արցախի դեմ իրականացվող հերթական ռազմական ագրեսիայի մասին։
Հայտարարությունում, մասնավորապես, նշվում է, որ «իրականացվում է տեղային բնույթի հակաաբեկչական գործողություն»։ Հաղորդվում է, որ «գերճշգրիտ զինատեսակների կիրառմամբ գործողությունների շրջանակում շարքից հանվում են Արցախի ՊԲ-ի դիրքերը, դրանց երկարաժամկետ կրակակետերը, ինչպես նաև մարտական միջոցներն ու ռազմական օբյեկտները»։
Նշվում է նաև, որ, իբր, քաղաքացիական բնակչությունն ու ենթակառուցվածքային օբյեկտները հարձակման չեն ենթարկվում։
Ի դեպ, Բաքուն պաշտոնապես հայտնում է նաև, որ իր գործողությունների մասին տեղեկացրել է ռուս խաղաղապահներին։
«Կատարվող գործողությունների մասին տեղեկացվել են Ռուսաստանի Դաշնության խաղաղապահ զորախմբի հրամանատարությունը և թուրք-ռուսական մոնիթորինգի կենտրոնի ղեկավարությունը»,- ասվում է հաղորդագրության մեջ։
Ավելի վաղ՝ Factor.am-ը հայտնել էր, որ Արցախում հակառակորդը դիմել է լայնամասշտաբ սադրանքի․ Ստեփանակերտի մեր աղբյուրները հայտնում են ադրբեջանական զինուժի կողմից հրետակոծության մասին։
