Վանում Ախթամարի Սուրբ Խաչ հայկական եկեղեցում տեղի է ունեցել ամենամյա պատարագը․ ԼՈՒՍԱՆԿԱՐՆԵՐ

Վանի Ախթամար կղզում գտնվող 1100-ամյա հայկական Սուրբ Խաչ եկեղեցում նախօրեին պատարագ է մատուցվել, գրում են թուրքական լրատվամիջոցները։

Սա 11-րդ պատարագն է, որը մատուցվում է 2010 թվականին եկեղեցու վերաբացումից հետո։ Թուրքիայի իշխանությունների կողմից ամեն տարի եկեղեցում միայն մեկ պատարագ է թույլատրվում։

Այցելուներին կղզի են տարել նավակներով։ Պատարագին մասնացել է նաև Պոլս Հայոց պատրիարք Սահակ արքեպիսկոպոս Մաշալյանը, Հովակիմ քահանա Սերոպյանը, որը ղեկավարել է ծեսը։ Արարողությանը մասնակցել են Գևաշի թաղապետ Բայրամ Յըլդըզը և քաղաքապետ Մուրադ Սեզերը։

Ծեսին մասնակցությունն այս տարի ավելի քիչ է եղել, քան նախորդ տարի։ Հայ համայնքը ցածր մասնակցությունը պայմանավորում է տնտեսական պատճառներով, անբավարար թռիչքներով և անվտանգության նկատառումներով։

Մինչդեռ, նախորդ տարիների համեմատ, կղզում ավելի շատ ոստիկաններ, շտապ բուժօգնության, առափնյա պահպանության ծառայության խմբեր են եղել, ոստիկանական ուղղաթիռները նույնպես հերթապահել են Վանա լճում:

Հավելենք, որ եկեղեցին կառուցվել է 915-921 թվականներին Բագրատունյաց Գագիկ 1-ին թագավորի հրամանով՝ Սուրբ Խաչի մասունքը պահպանելու նպատակով: Մասունքը 7-րդ դարից հետո բերվել է Վան՝ լինելով նախ Երուսաղեմում, ապա՝ Իրանում: 10-րդ դարում կառուցված եկեղեցին միջնադարյան հայկական ճարտարապետության վառ օրինակներից է: Հայտնի ճարտարապետ, նկարիչ և քանդակագործ Մանվելի կողմից կառուցված Սուրբ Խաչ եկեղեցին հայտնի է իր բազմազան քանդակներով:

Վերականգնողական աշխատանքների ավարտից հետո պատմական հայկական եկեղեցում առաջին պատարագը մատուցվել է 2010 թվականի սեպտեմբերի 19-ին՝ 95 տարի անց։ Եկեղեցում 2015 թվականին «անվտանգության» նկատառումներով ժամերգությունները դադարեցվել են 3 տարով։ 2017-ին տեղի է ունեցել 6-րդ պատարագը։

Էմմա Չոբանյան