01.05.2026 | 09:36
Աշխատում է քաղաքացին՝ զարգանում է տնտեսությունը՝ ապահովելով պետության առաջընթացը․ Ալեն Սիմոնյան
ԱՄՆ-ը Հյուսիսային Կորեային սպառնացել է «հետևանքներով»՝ Ռուսաստանին զենք մատակարարելու դեպքում
Քաղաքականություն
06.09.2023 | 23:17
Վաշինգտոնը Փհենյանին սպառնում է «հետևանքներով», եթե Հյուսիսային Կորեան զենք մատակարարի Ռուսաստանին։ Հյուսիսային Կորեան «դրա համար թանկ կվճարի» միջազգային հանրությունում, հայտարարել է ԱՄՆ ազգային անվտանգության հարցերով խորհրդական Ջեյք Սալիվանը։
Ամերիկացի պաշտոնյայի խոսքով՝ Հյուսիսային Կորեայի առաջնորդ Կիմ Չեն Ընն ակնկալում է պետությունների ղեկավարների մակարդակով Ռուսաստանի Դաշնությանը զենք մատակարարելու շուրջ բանակցությունների շարունակություն, գրում է DW-ի ռուսական ծառայությունը։
The New York Times-ն ավելի վաղ հայտնել էր, որ Կիմը մտադիր է սեպտեմբերին մեկնել Ռուսաստան՝ Վլադիմիր Պուտինի հետ զենքի մատակարարման գործարքը քննարկելու համար: Պարբերականի տվյալներով՝ հանդիպումը կարող է տեղի ունենալ Վլադիվոստոկում, ուր Հյուսիսային Կորեայի առաջնորդը, ամենայն հավանականությամբ, կժամանի զրահապատ գնացքով։
Կրեմլը ո՛չ հաստատել, ո՛չ էլ հերքել է այս հրապարակումը։
Ջեյք Սալիվանը հիշեցրել է, որ Ուկրաինայի դեմ պատերազմում ռուսական պաշտպանական արդյունաբերության կողմից բանակի կարիքները բավարարելու անկարողության պատճառով Կրեմլն ուղիներ է փնտրում դրսից զինամթերք գնելու համար։
«Մենք կշարունակենք հորդորել Հյուսիսային Կորեային՝ հավատարիմ մնալ իր հրապարակային պարտավորություններին և զենք չմատակարարել Ռուսաստանին»,- ընդգծել է նա։
