29.06.2026 | 12:10
Այրված մեքենայում 3 դի է հայտնաբերվել // Ավինյանը դժգոհ է ասֆալտապատման որակից․ ԼՈՒՐԵՐ
Կա վարկած, որ դիտավորություն էր․ Պեսկովը՝ Պրիգոժինի ինքնաթիռի կործանման մասին
Քաղաքականություն
30.08.2023 | 22:20
ՌԴ նախագահի մամուլի քարտուղար Դմիտրի Պեսկովը բացատրել է, թե ինչու «Վագներ» ռազմականացված խմբավորման հիմնադիր Եվգենի Պրիգոժինի ինքնաթիռի կործանման հետաքննությունը միջազգային չի լինելու։ Նա, մասնավորապես, շեշտել է, որ հետաքննությունը վարում է ՌԴ Քննչական կոմիտեն, գրում է Meduza-ն։
«Սա հենց մեր՝ ռուսական հետաքննությունն է»,- ասել է նա՝ հավելելով, որ չի կարող «խոսք լինել որևէ միջազգային հետաքննության մասին»։
Պեսկովը նաև նշել է, որ միջազգային հետաքննություն չի կարող տեղի ունենալ, քանի որ միջադեպի հիմնական վարկածներից մեկը համարվում է դիտավորյալ գործողությունը։
«Ակնհայտ է, որ կան տարբեր վարկածներ, որոնց թվում է կանխամտածված հանցագործությունը, այսպես ասենք»,- նշել է Կրեմլի խոսնակը։
Պեսկովն այսպես է մեկնաբանել Միջպետական ավիացիոն կոմիտեի պատասխանը Բրազիլիայի ավիացիոն իշխանությունների դիմումին (Պրիգոժինի ինքնաթիռն արտադրվել է բրազիլական Embraer ընկերության կողմից)։ Ավիացիոն պատահարների ուսումնասիրման և կանխարգելման բրազիլական կենտրոնը հայտնել էր, որ պատրաստ է մասնակցել հետաքննությանը, եթե ստանա համապատասխան հրավեր, և եթե այն իրականացվի միջազգային կանոնների համաձայն:
Հիշեցնենք, որ օգոստոսի 23-ին Տվերի մարզում վթարի էր ենթարկվել Եվգենի Պրիգոժինին պատկանող մասնավոր օդանավը։ Վթարի հետևանքով զոհվել է 10 մարդ՝ 7 ուղևոր և անձնակազմի 3 անդամ:
Էմմա Չոբանյան
