15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Թբիլիսին բելառուսական Belavia-ի նկատմամբ պատժամիջոցների հարցով դեռևս որոշում չի կայացրել
Քաղաքականություն
11.08.2023 | 21:50
Թբիլիսին դեռևս չի որոշել՝ կարգելի՞, արդյոք, բելառուսական Belavia ավիաընկերության թռիչքները երկրում։ Վրաստանի Քաղաքացիական ավիացիայի գործակալությունը մեկնաբանել է բելառուսական ավիաընկերության նկատմամբ ԱՄՆ-ի կողմից պատժամիջոցներ կիրառելու դեպքը, գրում է Aliq.ge-ն:
«Գործակալությունը համապատասխան պետական գերատեսչությունների հետ մանրամասն կուսումնասիրի Միացյալ Նահանգների ֆինանսների նախարարության արտաքին ակտիվների վերահսկման դեպարտամենտի կողմից Belavia ավիաընկերության նկատմամբ կիրառվող նոր պատժամիջոցները, և միայն դրանից հետո համապատասխան որոշում կկայացվի»,- ասվում է քաղավիացիայի գործակալության տարածած հաղորդագրության մեջ:
Նշվում է նաև, որ արտադրողի կողմից սահմանված պատժամիջոցների պատճառով Վրաստանի քաղաքացիական ավիացիայի գործակալությունը այս տարվա հունիսից սահմանափակել է Belavia ավիաընկերության գործունեությունը Վրաստանում Boeing տիպի ինքնաթիռներով։ Գործակալությունը պարզաբանում է՝ այս ավիաընկերությունն այժմ թռիչք է իրականացնում Embraer տիպի ինքնաթիռներով։
Ի դեպ, Belavia-ն չվերթեր է իրականացնում Վրաստանի բոլոր երեք միջազգային օդանավակայաններից՝ Թբիլիսիից, Քութայիսիից և Բաթումիից:
ԱՄՆ-ի՝ Մինսկի դեմ պատժամիջոցները խստացվել են Բելառուսում 2020 թվականի նախագահական ընտրություններից հետո, որի պաշտոնական արդյունքները ԱՄՆ-ը չի ճանաչել։ Քվեարկությամբ հաղթող է ճանաչվել Ալեքսանդր Լուկաշենկոն, որը երկիրը ղեկավարում է 1994 թվականից։ Բելառուսի իշխանությունները ճնշել են մի քանի ամիս տևած բողոքի զանգվածային ցույցերը։ Բողոքի ցույցերի հարյուրավոր մասնակիցներ բանտարկվեցին, հազարավոր մարդիկ լքեցին երկիրը։ Բելառուսի դեմ պատժամիջոցները հետագայում խստացվեցին այն բանից հետո, երբ Լուկաշենկոյի ռեժիմը աջակցեց Ռուսաստանի ներխուժմանը Ուկրաինա:
