15.09.2026 | 23:30
Օգոստոսին Հայաստան է այցելել 227,026 զբոսաշրջիկ
Ռուսները բռունցք են ստեղծել Կուպյանսկի ուղղությամբ բեկում մտցնելու համար, բայց Ուկրաինայի ԶՈՒ-ի պաշտպանությունն ուժեղ է. գեներալ Սիրսկի
Քաղաքականություն
09.08.2023 | 21:58
Ուկրաինայի Զինված ուժերի ցամաքային զորքերի հրամանատար, գեներալ Ալեքսանդր Սիրսկին խոսել է Ուկրաինայի արևելյան Կուպյանսկի ուղղությամբ ստեղծված բարդ իրավիճակի մասին, որտեղ, ըստ առկա տվյալների, կենտրոնացած է շուրջ 100,000 ռուս զինծառայող, փոխանցում է BBC-ի ռուսական ծառայությունը։
Խարկովի մարզի Կուպյանսկի ուղղությունը ռուսներն ընտրել են որպես գրոհի գլխավոր ուղղություն՝ ստեղծելով «Շտորմ-Z» 8 գրոհային ջոկատ։ Ինտենսիվ մարտեր են ընթանում, որոշ դիրքեր մի քանի անգամ ձեռքից ձեռք են անցնում, պատմել է գեներալ Սիրսկին։
«Հակառակորդի նպատակն է ճեղքել մեր զորքերի պաշտպանությունն ու անմիջապես Կուպյանսկ դուրս գալ»,- ասել է նա։
Միևնույն ժամանակ, Նովոսելովսկոյե շրջանից առաջ շարժվելով՝ ռուսական ստորաբաժանումները փորձել են կտրել Ուկրաինայի ԶՈւ խմբավորումն այդ թևի ուղղությամբ հարվածով և շրջապատել այնտեղ պաշտպանությունը պահող բրիգադի ստորաբաժանումները, սակայն ապարդյուն, ասել է Սիրսկին։
«Մեր մարտիկները խիզախորեն պահում են պաշտպանությունը՝ հետ մղելով հակառակորդի առաջ շարժվելու բոլոր փորձերը»,- ասել է ուկրաինացի գեներարը։
