17.12.2025 | 20:00
Եթե ընդդիմությունը ՌԴ-ի երգն է երգում, այո՛, թիրախավորվելու է իբրև հիբրիդային սպառնալիք․ Էդգար Խաչատրյան. ՏԵՍԱՆՅՈՒԹ
Հացահատիկային գործարքի վերականգնումը կախված է Արևմուտքի խոստումների կատարումից․ Էրդողան
Քաղաքականություն
09.08.2023 | 14:20
Թուրքիայի նախագահ Ռեջեփ Թայիփ Էրդողանը նախօրեին Անկարայում դեսպանների 14-րդ համաժողովին ունեցած ելույթում անդրադարձել է նաև ուկրաինական պատերազմին ու հացահատիկային գործարքին։ Էրդողանն ասել է, որ «Թուրքիան սեղանի շուրջ է հավաքել պատերազմող կողմերին և ջանքեր գործադրել արյունահեղությունը դադարեցնելու համար», հաղորդում է TRT Haber-ը։
«Հուլիսի 17-ից դադարեցված Սևծովյան հացահատիկային նախաձեռնության ուղղությամբ մեր աշխատանքները շարունակվում են։ Անցյալ շաբաթ մենք Պուտինի հետ քննարկել ենք այդ հարցը։ Կարծում եմ՝ կարող ենք ընդհանուր հայտարարի գալ այս հարցում։ Սևծովյան նախաձեռնությամբ սկիզբ առած դրական մթնոլորտը որոշ երկրների կողմից լավ չընդունվեց։ Ընդհակառակը, կրակի վրա յուղ էր լցվում։ Մենք չենք ցանկանում, որ այս լարվածությունն այլևս շարունակվի։ Մենք շարունակելու ենք անկեղծորեն աշխատել բոլոր կողմերի հետ։ Պատերազմի տարածումը դեպի Սև ծով լիակատար աղետ կլինի ամբողջ տարածաշրջանի համար»,- ասել է Թուրքիայի նախագահը։
Նա նշել է, որ հացահատիկային գործարքի վերականգնման աշխատանքները շարունակվում են։
«Մեր շփումները շարունակվում են հուլիսի 17-ից կասեցված նախաձեռնության վերագործարկման համար՝ ընդլայնելով դրա շրջանակը։ Անկասկած, այս խնդրի՝ առանց հետագա փակուղու լուծումը կախված է արևմտյան երկրների խոստումների կատարումից»,- հայտարարել է Էրդողանը։
Հիշեցնենք, որ Սևծովյան հացահատիկային գործարքը կնքվել է 2022 թվականի հուլիսի 22-ին ՄԱԿ-ի, Թուրքիայի, ՌԴ-ի և Ուկրաինայի միջև՝ Սև ծովի Ուկրաինայի նավահանգիստներով ուկրաինական հացահատիկի անվտանգ արտահանման համար։ Ստորագրումից ի վեր գործարքն արդեն մի քանի անգամ երկարաձգվել է։ Դրա ժամկետը լրացրել է հուլիսի 17-ին, և Մոսկվան հրաժարվում է երկարաձգել։
Էմմա Չոբանյան
