Քաղաքականություն
08.08.2023 | 21:56
Բելառուսում կեղծված նախագահական ընտրություններից երեք տարի անց բռնաճնշումները, կամայական ձերբակալությունները և ուժայինների կողմից համատարած բռնությունները «շարունակում են մնալ սովորական երևույթ»։ Այս մասին հայտարարել է Մայնի Ֆրանկֆուրտում գործող Մարդու իրավունքների միջազգային ընկերությունը (IGFM), գրում է DW-ի ռուսական ծառայսւթյունը:
Ըստ կազմակերպության՝ ավելի քան 1,400 մարդ շարունակում է մնալ բանտում քաղաքական դրդապատճառներով։ ՌԴ-ի և Իրանի բռնապետական ռեժիմների օգնությամբ Բելառուսի կառավարիչ Ալեքսանդր Լուկաշենկոն ոչնչացնում է «Բելառուսի քննադատական և անկախ քաղաքացիական հասարակությունը», ընդգծել է IGFM-ը։
Իրավապաշտպաններն ուշադրություն են հրավիրում ազատազրկված բելառուս ընդդիմադիրներ Մարիա Կոլեսնիկովայից, Սերգեյ Տիխանովսկուց և Վիկտոր Բաբարիկոյից որևէ նորության բացակայության վրա և մտավախություն հայտնում նրանց առողջության համար։
2020 թվականին Բելառուսում կեղծված ընտրություններից հետո ավելի քան 10,000 մարդ ձերբակալվել է, խոշտանգվել, որոշ դեպքերում՝ շարունակում է մնալ առանց դատավարության գերբեռնված բանտախցերում, նշել է IGFM-ը։ Շատերը զոհվել են նպատակաուղղված զանգվածային բռնությունների արդյունքում, հավելել են իրավապաշտպանները։
Միաժամանակ, IGFM-ը Մինսկին կոչ է արել զերծ մնալ Իրանի հետ սպառազինության ոլորտում Լուկաշենկոյի ծրագրած համագործակցությունից։ Պատերազմի ուսումնասիրության ամերիկյան ինստիտուտի (ISW) տվյալներով՝ կողմերը քննարկել են Բելառուսում «Շահեդ» կամիկաձե անօդաչու թռչող սարքերի արտադրության ձեռնարկություններ գործարկելու հնարավորությունը՝ Ուկրաինա ռուսական լայնամասշտաբ ներխուժմանն աջակցելու համար: Հարցը բարձրացվել է հուլիսի 31-ին Բելառուսի պաշտպանության նախարար Վիկտոր Խրենինի և իր իրանցի գործընկեր Մոհամմադ Ռեզա Աշտիանիի հանդիպման ժամանակ, հայտնում է ISW-ն։ Հանդիպման արդյունքում ստորագրվել է ռազմական համագործակցության պլան։
