25.02.2026 | 23:29
Ինչպես են ադրբեջանցի գործարարները ՌԴ-ին օգնում շրջանցել պատժամիջոցները. FT-ի հետաքննությունը
Թաթարստանում ուսանողներին ստիպում են Shahed անօդաչու սարքեր հավաքել
Քաղաքականություն
25.07.2023 | 23:30
Թաթարստանի «Ալաբուգա» հատուկ տնտեսական գոտում գտնվող «Ալաբուգա պոլիտեխնիկ» քոլեջի անչափաս ուսանողներին ներգրավում են Shahed անօդաչու թռչող սարքերի հավաքման մեջ, այդ թվում՝ սպառնալով տուգանքներով և հեռացմամբ։ Այս մասին ասվում է «Протокол»-ի և «РЗВРТ» յութուբյան ալիքի համատեղ հետաքննության մեջ, փոխանցում է DW-ի ռուսական ծառայությունը։
Ըստ լրատվամիջոցների զրուցակիցների՝ «Ալաբուգա պոլիտեխնիկի» մոտ 1000 ուսանողներից մի քանի հարյուրը ներգրավված են իրանական անօդաչու թռչող սարքերի հավաքման մեջ։ Նախ, ըստ աղբյուրների, խոսքը 15-ից 17 տարեկան դեռահասների մասին է, որոնք քոլեջ են ընդունվել դպրոցի 9-րդ դասարանից հետո։ Հետաքննության հեղինակների պնդմամբ՝ անօդաչուների հավաքման ծրագրում բոլոր հնարավոր ուժերն են ներդրվում, դրա համար նույնիսկ դադարեցնում կամ չեղարկում են մյուս նախագծերը։
Անօդաչուների հավաքման համար ուսանողները ստանում են ամսական 30-40 հազար ռուբլի։ Հաճախ նրանք ստիպված են լինում աշխատել առանց հանգստի և սննդի։ Բացի այդ, ուսանողները չեն կարող բացահայտել տեղեկատվությունը արտադրության մասին։ Դա ամրագրված է պայմանագրում: Ուսանողից խախտման համար կարող է պահանջվել քոլեջին վճարել 1,5-2 միլիոն ռուբլի տուգանք։
Բացի այդ, ըստ ուսանողների, քոլեջում տեսախցիկներից բացի՝ տեղադրված են գաղտնալսման համակարգեր։
«Այս ամենը մեզ այնքան էլ դուր չի գալիս: Բայց նախագծից դուրս գալն անհնար է՝ կա՛մ հեռացնում են, կա՛մ նստում ես նախագծի վրա աշխատելու»,- ասել է ուսաողներից մեկը։
Մեկ այլ ուսանողի խոսքով էլ՝ բոլոր նրանցից, որոնք անօդաչու թռչող սարքերի արտադրությամբ են զբաղվում, Ալաբուգայի անվտանգության ծառայությունն աշխատանքը սկսելուց առաջ վերցնում է հեռախոսները, զննում նամակագրությունը, որի «պատճառով բազմաթիվ հեռացումներ են եղել տեղեկատվության տարածման համար»։
«Ալաբուգա պոլիտեխնիկ» քոլեջը հիմնադրվել է 2021 թվականին։ Դրա գլխավոր տնօրենը Թաթարստանի Պետական խորհրդի պատգամավոր Թիմուր Շագիվալեևն է։
Էմմա Չոբանյան
