25.07.2026 | 11:33
Երևանում փոշու պարունակությունը գերազանցել է թույլատրելի շեմը միայն Կենտրոնում
ԿՀՎ ղեկավարը հաստատել է, որ ԱՄՆ-ը նախապես իմացել է Պրիգոժինի ապստամբության նախապատրաստման մասին
Քաղաքականություն
21.07.2023 | 14:49
ԱՄՆ Կենտրոնական հետախուզական վարչության (ԿՀՎ) տնօրեն Ուիլյամ Բըրնսը ռուսական մասնավոր ռազմական «Վագներ» ընկերության ապստամբությունից գրեթե մեկ ամիս անց հայտարարել է, որ ԱՄՆ-ը նախօրոք իմացել է այդ մասին։ Անվտանգության ֆորումում Բըրնսի ելույթի հրապարակվել է Ասպենի ինստիտուտի կողմից, փոխանցում է Meduza-ն:
«Նախագահ Ջո Բայդենը ստույգ ձևակերպել է այն, երբ ասել է, որ մենք այդ մասին իմացել ենք ժամանակից շուտ»,- ասել է Բըրնսը։
Նա պարզաբանել է, որ «Վագների» հիմնադիր Եվգենի Պրիգոժինի՝ գործելու որոշումը սպասելի է եղել, քանի որ նա երկար ժամանակի ընթացքում հետևողական քննադատել է պաշտպանության նախարար Սերգեյ Շոյգուին և ԳՇ պետ Գերասիմովին։
ԿՀՎ ղեկավարը հավելել է, որ ՌԴ նախագահ Վլադիմիր Պուտինը դեռ չի որոշել՝ ինչ անել Պրիգոժինի հետ, քանի որ «Վագները» մեծ նշանակություն ունի Ռուսաստանի ղեկավարության համար, այդ թվում՝ Աֆրիկայում և Մերձավոր Արևելքում գործունեության առումով։ Ըստ նրա՝ Պուտինը փորձելու է Պրիգոժինին առանձնացնել «Վագներ»-ից, հետո հաշիվները մաքրել նրա հետ։
«Իմ փորձից ելնելով՝ Պուտինը վրեժխնդրության գերագույն առաքյալն է, ուստի ես կզարմանամ, եթե Պրիգոժինը խուսափի հետագա վրեժխնդրությունից»,- ասել է Ուիլյամ Բըրնսը։
Հիշեցնենք, որ «Վագների» զինյալները Պրիգոժինի գլխավորությամբ ապստամբություն էին սկսել և Դոնի Ռոստովից շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։
Էմմա Չոբանյան
