14.12.2025 | 20:34
Դեկտեմբերի 15-ին Արարատ Միրզոյանն աշխատանքային այցով գտնվելու է Բրյուսելում
2-րդ նախագահի գրասենյակից առաջարկում են Ռոբերտ Քոչարյանի հարցաքննությունը սկզբից մինչև վերջ տեսաձայնագրել
Քաղաքականություն
09.07.2018 | 14:22
«Մենք ծանուցում ենք ստացել Հատուկ քննչական ծառայությունից Մարտի 1-ի գործով որպես վկա հարցաքննության ներկայանալու կապակցությամբ: Հաշվի առնելով, որ հարցը գտնվում է մամուլի ուշադրության կենտրոնում, ես որոշեցի հրապարակել նամակը, որով պատասխանել ենք հարցաքննության գնալու հայցին: Ծանուցագրով հարցաքննության օր էր նշանակվել հուլիսի 6-ը, սակայն մենք տեղեկացրինք, որ Ռոբերտ Քոչարյանը կվերադառնա Հայաստան ոչ շուտ, քան 2018թ. հուլիսի 25-ը: Երևան վերադառնալուց հետո Ռոբերտ Քոչարյանը պատրաստ է պատասխանել ՀՔԾ քննիչի կողմից իրեն ուղղված հարցերին»,-այսoր լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը:
Վիկտոր Սողոմոնյանն ընթերցեց ՀՔԾ-ին ուղարկված նամակը, որում, մասնավորապես, ասված է, որ Ռ․ Քոչարյանը Հայաստան կվերադառնա հուլիսի 25-ից ոչ շուտ, իսկ եթե մինչև հուլիսի 25-ն առաջանան անհրաժեշտ հանգամանքներ Ռ․ Քոչարյանը պատրաստ է պատասխանել նախապես տրամադրված հարցերին գրավոր կամ կապի այլ միջոցներով։
Վիկտոր Սողոմոնյանը հորդորեց ուշադիր կարդալ 2005 թվականի Սահմանադրությունը, մասնավորապես, Զինված ուժերին վերաբերող հատվածը, նախագահի լիազորությունները, համադրել փաստահավաք խմբի փաստերի հետ։
«Ակնհայտ փաստեր ուղղակի անտեսված են։ Այսինքն, պարզապես, հարմարեցում է տեղի ունեցել այն քաղաքական նպատակներին, որ փաստահավաք խումբը հետապնդել է։ Իսկ այդպիսի նպատակներն ակնհայտ են, դրանց գոյությունը քննարկումից դուրս է։ Չկա այնպիսի հարց, որը կստիպի մեզ անհանգստանալ»,-ասաց նա։
Վերջինս նաև հավելեց, որ իրենք առաջարկում են հարցաքննությունը սկզբից մինչև վերջ տեսաձայնագրել՝ այն անհրաժեշտության դեպքում հրապարակելու համար:
