14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ինչու է Թուրքիան ձգտում բարելավել հարաբերությունները Եգիպտոսի և ԱՄԷ-ի հետ․ The Jerusalem Post-ի անդրադարձը
Քաղաքականություն
05.07.2023 | 23:30
Թուրքիան ձգտում է կապ հաստատել Եգիպտոսի և ԱՄԷ-ի հետ։ Մասնավորապես, Թուրքիան ու Եգիպտոսը դեսպաններ են նշանակում՝ դիվանագիտական հարաբերությունների վերականգնման գործընթացում են։ Բացի այդ, Թուրքիայի նախագահ Ռեջեփ Թայիփ Էրդողանը, որը նոր է վերընտրվել, մեկնում է ԱՄԷ։ Այցը ներառելու է երկկողմ նոր համաձայնագրերի ստորագրում, ասվում է The Jerusalem Post-ի անդրադարձում։
Հոդվածագիրը նշում է, որ այս երկու աննշան կամ չնչին թվացող զարգացումներն իրականում բավականին նշանակալից են, քանի որ Անկարան նախկինում սառը հարաբերություններ ուներ Կահիրեի և Աբու Դաբիի հետ, հատկապես՝ 2013-2021 թվականներին: Սակայն Անկարան փոխել է իր քաղաքականությունը, հաշտեցման է ձգտում ամբողջ տարածաշրջանում, այդ թվում՝ Իսրայելի հետ:
Նշվում է, որ մեկ այլ կարևոր դերակատար՝ Իրանը, նույնպես դիվանագիտական նոր կապեր է ստեղծում Ծոցի երկրների հետ՝ Սաուդյան Արաբիայի և Եգիպտոսի: Այս ամենը միասին նշանավորում են նոր դարաշրջան Մերձավոր Արևելքի համար, որը նշանավորվում է ավելի շատ դիվանագիտությամբ և ավելի քիչ ճակատային պատերազմով:
Ըստ հոդվածագրի՝ Իսրայելի համար սա որոշակի մարտահրավերներ է ներկայացնում: Իսրայելի ռազմական գործողությունը Ջենինում բուռն քննադատություն է առաջացրել տարածաշրջանում։ Իրանը ձգտում է շահարկել դա՝ փորձելով ներխուժել Պարսից ծոց։ Միաժամանակ, աճում է Իսրայելի նկատմամբ քննադատությունը Պարսից ծոցի երկրների որոշ լրատվամիջոցներում:
Սա նշանակում է, որ Թուրքիան և Իրանը կարող են ամրապնդել իրենց կապերը Իսրայելի հետ հարաբերություններ պահպանող երկրների հետ, ինչպիսիք են Եգիպտոսը և ԱՄԷ-ն։ Դեռևս պարզ չէ՝ արդյո՞ք այնպիսի կարևոր միջազգային ֆորումներ, ինչպիսին Նեգևի ֆորումն է, շուտով կվերսկսեն հանդիպումները։ Նեգևի ֆորումը ներառում է Իսրայելը, Պարսից ծոցի երկրները և Եգիպտոսը:
Անկարան ԱՄԷ-ն տեսնում է որպես կարևոր դերակատար, ԱՄԷ-ն էլ ձգտում է արդյունավետ կապերի՝ «ամրապնդելու իր գործընկերությունը, ընդլայնելու հարաբերությունները և ամրապնդելու համագործակցության կամուրջները բոլոր ոլորտներում՝ հիմնված Թուրքիայի տարածաշրջանային և համաշխարհային ներկայության և կարևորության վրա»։
Եգիպտոսում էլ մեկնաբանները կարևորում են դեսպանների փոխադարձ նշանակումը և չեն բացառում առաջիկայում երկու երկրների նախագահների հանդիպումը։
Էմմա Չոբանյան
