14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Զելենսկին հանձնարարել է ԶՈՒ-ին ուժեղացնել հյուսիսային ուղղությունը․ այն կարող է կապված լինել Բելառուսում «Վագների» տեղակայման հետ
Քաղաքականություն
30.06.2023 | 22:00
Ուկրաինայի նախագահ Վլադիմիր Զելենսկին հանձնարարել է երկրի ԶՈՒ-ին ամրացնել հյուսիսային ուղղությունը։ Որոշումն ընդունվել է Ուկրաինայի ԶՈՒ գերագույն հրամանատարի շտաբի նիստում, որին առանձին զեկույց է ներկայացվել Բելառուսում տիրող իրավիճակի վերաբերյալ, գրում է BBC-ի ռուսական ծառայությունը։
Նշվում է, որ Բելառուսում տեղակայվելու է «Վագներ» մասնավոր ռազմական խմբավորումը, ուր ապստամբությունից հետո տեղափոխվել է դրա հիմնադիր Եվգենի Պրիգոժինը։ «Վագների» վարձկանների՝ Բելառուս ժամանման մասին դեռևս չի հաղորդվում։
Ապստամբությունից հետո իր ելույթում ՌԴ նախագահ Վլադիմիր Պուտինն ասել էր, որ խմբի վարձկանները կկարողանան պայմանագրեր կնքել ՊՆ-ի հետ, հակառակ դեպքում՝ կարող են գնալ Բելառուս։
Այս երկրի նախագահ Ալեքսանդր Լուկաշենկոն էլ հայտարարել էր, որ «Վագները» տեղակայվելու է Բելառուսում՝ լքված զորամասի տարածքում։
Ուկրաինայի Զինված ուժերի գլխավոր հրամանատար Վալերի Զալուժնին էլ Washington Post-ին տված հարցազրույցում ասել էր, որ անհանգստացած է «Վագների»՝ Բելառուսի տարածք տեղափոխմամբ։
«Ես մտավախություն ունեմ շատ բաներից, այդ թվում՝ «Վագներից»։ Մեր խնդիրն է պատրաստվել վատթարագույն և ավելի հավանական սցենարին։ Եվ մենք կձգտենք նվազեցնել բոլոր հնարավոր հետևանքները»,- հայտարարել էր նա։
Էմմա Չոբանյան
