14.12.2025 | 20:34
Դեկտեմբերի 15-ին Արարատ Միրզոյանն աշխատանքային այցով գտնվելու է Բրյուսելում
Բրայան Ադամսը, Էրիկ Կանտոնան և այլ հայտնի գործիչներ Թուրքիայից պահանջում են ազատ արձակել քուրդ երգչուհուն
Քաղաքականություն
30.06.2023 | 22:19
Աշխարհի տարբեր հատվածներից հայտնի գործիչներ միավորվել են՝ կոչ անելով ազատ արձակել քուրդ երաժիշտ Նուդեմ Դուրաքին, որն ութ տարի բանտարկված է Թուրքիայում: Նամակը ստորագրած 47 հայտնիների թվում են Նոբելյան մրցանակակիր, գրող Աննի Էռնոն, հայտնի երաժիշտ Բրայան Ադամսը, նախկին ֆուտբոլիստ Էրիկ Կանտոնան, դերասանուհի Ժուլիետ Բինոշը, ինչպես նաև Թուրքիայից Ասլի Էրդողանը, Փինար Սելեկը և Էջե Թեմելքուրանը, գրում է Gercek news-ը։
Նրանք միավորվել են՝ դատապարտելու Koma Sorxwin խմբի վոկալիստ Դուրաքի բանտարկությունը և արդարություն պահանջելու նրա և մյուս քաղբանտարկյալների համար։
Դուրաքը ձերբակալվել է 2015-ին և դատապարտվել 19 տարվա ազատազրկման՝ «ահաբեկչական կազմակերպությանն անդամակցելու» մեղադրանքով․ հանցագործություն, որի համար մեղադրվում են Թուրքիայի ընդդիմադիր շատ գործիչներ: Նրան դատապարտել են քրդական քաղաքական երգեր կատարելու համար, որոնք դիտվել են որպես «ահաբեկչական կազմակերպության անդամ լինելու ապացույց»։
Հայտնիների ստորագրած միջազգային հայտարարության մեջ ընդգծվում է, որ Դուրաքը որևէ կազմակերպության հետ կապ չունի, ասվում է, որ եթե նշանակված պատիժը կրի, ապա նա ազատ չի արձակվի մինչև 2034 թվականը։ Նշվում է, որ իշխանությունները սխալմամբ են Դուրաքի գործունեությունը որակել որպես «ահաբեկչություն», և որ երգչուհին որևէ քաղաքական կուսակցության անդամ չէ, իր ձայնն ու արվեստն օգտագործել է՝ պատմականորեն ճնշված փոքրամասնությանը ձայն տալու համար:
Էմմա Չոբանյան
