Քաղաքականություն
29.06.2023 | 21:01
Թուրքիայի նախագահ Ռեջեփ Թայիփ Էրդողանը խստորեն դատապարտել է նախօրեին Շվեդիայում Ղուրան այրելու բողոքի ակցիան, գրում է Անադոլու գործակալությունը։
Դիմելով Թուրքիայի իշխող «Արդարություն և զարգացում» կուսակցության ֆունկցիոներներին՝ Էրդողանն ասել է, որ Անկարայի արձագանքը Ստոկհոլմում տեղի ունեցածին չափազանց կոշտ է լինելու, և այդ ընթացքը կշարունակվի այնքան ժամանակ, մինչև Արևմուտքը չսովորի վճռականություն դրսևորել «իսլամատյացության և ահաբեկչության դեմ պայքարում»։
Թուրքիայի նախագահն ընդգծել է, որ այն կառույցները, որոնք արտահայտվելու ազատության քողի տակ արտոնում են «ստոր հակաիսլամական գործողությունները կամ անտեսում են իսլամատյացության դրսևորումները, չեն հասնի իրենց նպատակներին»։
«Մահմեդական համոզմունքները վիրավորելը ոչ մի կապ չունի խոսքի ազատության հետ: Վաղ թե ուշ մենք Արևմուտքում որոշակի շրջանակների կստիպենք ճանաչել այդ փաստը»,- ասել է Էրդողանը։
Նա նշել է, որ Թուրքիան երբեք չի տրվի այն ուժերին, որոնք փորձում են սադրել կամ օգտագործել սպառնալիքների լեզուն Անկարայի դեմ։
Նախօրեին 37-ամյա Սալվան Մոմիկան, որը մի քանի տարի առաջ Իրաքից փախել էր Շվեդիա, ոստիկանությունից թույլտվություն էր խնդրել բողոքի ակցիա անցկացնել և այրել մահմեդականների Սուրբ գիրքը «Ղուրանի մասին իր կարծիքն արտահայտելու համար»։ Մոմիկան ոտքով հարվածել էր Ղուրանին, գրքի մեջ խոզապուխտ լցրել և այրել էջերը։
Հիշեցնենք, որ հունվարին Թուրքիայի դեսպանատան մոտ մահմեդական Սուրբ գրքի այրումը հանգեցրել էր շաբաթներ տևած բողոքի ցույցերի, շվեդական ապրանքները բոյկոտելու կոչերի և հետագայում Անկարայի կողմից ՆԱՏՕ-ին Շվեդիայի անդամակցության հայտը կասեցման։
Էմմա Չոբանյան
