18.03.2026 | 15:21
Լարիջանիի սպանությունը չի ապակայունացնի Իրանի քաղաքական համակարգը. Արաղչի
Իլոն Մասկն ու ԵՄ-ն բանակցում են բովանդակության մասին նոր օրենքի ներդրումից առաջ
Քաղաքականություն
23.06.2023 | 22:29
Ներքին շուկայի հարցերով եվրահանձնակատար Թիերի Բրետոնն այցելել է Սան Ֆրանցիսկո, որտեղ հանդիպել է Twitter ընկերության ղեկավարության և դրա սեփականատեր Իլոն Մասկի հետ։ Օգոստոսի վերջին ԵՄ-ում ուժի մեջ է մտնում Թվային ծառայությունների մասին նոր օրենքը, որը կպարտադրի Եվրոպայում գործող ինտերնետային հարթակներին ավելի խստորեն վերահսկել վտանգավոր բովանդակությունը։ Կանոնները չկատարելու դեպքում նրանց սպառնում է եկամուտների մինչև 6 տոկոսի չափով տուգանք և նույնիսկ ԵՄ-ում աշխատելու արգելք, հաղորդում է Euronews-ը։
Twitter-ը եվրոպացի պաշտոնյաների մոտ հատուկ մտահոգություններ է առաջացնում, քանի որ ընկերությունը գնելուց հետո Իլոն Մասկը զգալիորեն թուլացրել է բովանդակության կարգավորման ներքին կանոնները՝ ատելության խոսքի և ապատեղեկատվության հրապարակումները թույլ տալու համար: Միևնույն ժամանակ, անցյալ շաբաթ Փարիզ կատարած այցի ժամանակ Մասկը խոստացել էր, որ Twitter-ը կենթարկվի ԵՄ-ի նոր կանոններին։
«Իմ առաքելությունը նրանում է, որ համոզվեմ՝ օգոստոսի 25-ից նրանք պահպանելու են օրենքը, հակառակ դեպքում՝ չեն կարողանա շարունակել գործունեությունը Եվրոպայում։ Նրանք բոլորը ցանկանում են շարունակել աշխատել Եվրոպայում»,-ասել է Բրետոնը։
Բացի Twitter-ից՝ նման ընկերությունների ցանկում են TikTok-ը և Meta-ն։ Եվրահանձնակատարի խոսքով՝ Բրյուսելում շատ լրջորեն կհետևեն երեխաների նկատմամբ բռնությունների և կեղծ ընտրությունների հետ կապված բովանդակության կարգավորմանը։
Սպասվում է, որ Բրետոնը ԵՄ-ի նոր պահանջները քննարկելու է նաև Meta-ի գործադիր տնօրեն Մարկ Ցուկերբերգի հետ։
Էմմա Չոբանյան
