25.11.2024 | 15:17
Խախտումներ շինհրապարակում. ԲԸՏՄ
Ո՛չ սնունդ կա, ո՛չ հարմարություն․ Ալիևը Լաչինում ադրբեջանցիներին պատանդի կարգավիճակո՞ւմ է պահում
Քաղաքականություն
15.06.2023 | 23:17
Արցախյան 44-օրյա պատերազմից հետո Բաքվի վերահսկողության տակ անցած տարածքները դարձել են Ադրբեջանի նախագահ Իլհամ Ալիևի և նրա ընտանիքի քարոզչական գործիքը։ Ալիևներն այստեղ ակտիվորեն բիզնես գործունեությամբ են զբաղվում, իսկ ադրբեջացիների մուտքն այս տարածքներ արգելված է․ նրանք հնարավորություն ունեն այցելելու հատուկ թույլտվությամբ՝ պետության կողմից կազմակերպվող վճարովի տուրերով։
Վերաբնակեցման մասին հայտարարությունները ևս քարոզչական նպատակ ունեն։ Նախ՝ իշխանությունները վերաբնակեցրել են խիստ սահմանափակ թվով մարդկանց՝ պատրանք ստեղծելով, թե հոգում են մարդկանց կարիքները, լավագույն պայմաններն են ստեղծում, ինչն իրականությանը չի համապատասխան։
Մասնավորապես, մայիսի վերջին Բաքուն 20 ընտանիքի տեղափոխել էր Լաչին, որոնց հետո հանդիպել էր նախագահ Իլհամ Ալիևն ու հայտարարել, որ ստեղծված են անհրաժեշտ բոլոր պայմանները։ Լաչին տեղափոխված բնակիչները, սակայն, դժգոհում են գործազրկությունից, սննդի և կենցաղային պայմանների բացակայությունից։
«Երբ մենք եկանք, ուտելիք էինք բերել մեզ հետ, դրանով էլ մինչև հիմա ապրում ենք, բայց արդեն սպառվում է։ Այստեղ խնդիր կա շուկայի հետ։ Ուզում եմ նաև աշխատել»,- ադրբեջանական լրատվամիջոցներից մեկի հետ զրույցում պատմել է Քոնուլ Նաջաֆովան։
Նա նշել է, որ 7 հոգանոց ընտանիքի անդամների հետ տեղափոխվել է Լաչին՝ հավելելով, որ սննդի մատակարարման հետ կապված լուրջ դժվարություններ ունեն։
Լաչին տեղափոխվածներից Գյունդուզ Թահմազովն էլ ասել է, որ Բաքվում վարորդ է աշխատել, իսկ Լաչինում իր համար աշխատանք չկա։ Նրա խոսքով՝ առանց լրացուցիչ աջակցության չեն կարողանա բավարարել ընտանիքի կարիքները։
«Մենք 5 հոգանոց ընտանիք ենք, մեզ աշխատանք է պետք։ Ես վարորդ եմ, ասացին՝ գործ կլինի, երբ բիզնեսները բացվեն։ Այս պահին մենք ապրում ենք մեր հաշվին։ Զանգում ենք, եղբայրներս անհրաժեշտ իրերն ուղարկում են Բաքվից։ Ես աշխատում եմ Բաքվում, եկել եմ այստեղ ժամանակավոր թույլտվությամբ։ Երեխաներն անչափահաս են, այստեղ էլ ոչինչ չկա։ Շատ պահանջներ կան։ Տունը մի քանի բացասական կողմ ունի՝ չկա գազ, լույս, ջուր»,- ասել է նա։
Հավելենք, որ նախօրեին էլ պետական լրատվամիջոցները հայտնել էին, որ ևս 22 ընտանիքի են տեղափոխում Լաչին։
Էմմա Չոբանյան
