Ռումինիայի նախագահական ընտրությունների առաջին փուլում առաջատար է ՆԱՏՕ-ին և Ուկրաինային օգնությունը քննադատած Քելին Ջորջեսկուն

Ռումինիայում նախագահական ընտրությունների առաջին փուլի արդյունքներից հետո անկախ թեկնածու Քելին Ջորջեսկուն, որը նախկինում եղել է աջ ծայրահեղական «Հանուն ռումինացիների միասնության դաշինքի» (AUR) անդամ և քննադատել է ԵՄ-ին և ՆԱՏՕ-ին, անսպասելիորեն դարձել է առաջատար։ Հաջորդը գործող վարչապետ, Սոցիալ-դեմոկրատական կուսակցության (PSD) առաջնորդ Մարսել Չիոլակուն է, որը համարվում էր ընտրարշավի ֆավորիտը, գրում է DW-ի ռուսական ծառայությունը։

99%-ից ավելի ձայների հաշվարկից հետո Ջորջեսկուն հավաքել է 22,8%, Չիոլակուն՝ 19,3% ձայն։ Այժմ երկու թեկնածուներն էլ կհանդիպեն դեկտեմբերի 8-ին կայանալիք երկրորդ փուլում:

Նախապես Չիոլակուի գլխավոր մրցակիցը համարվում էր AUR-ի առաջնորդ Ջորջե Սիմիոնը։ Նա, սակայն, նախնական տվյալներով, զբաղեցրել է չորրորդ տեղը։

BBC-ն նշում է, որ պաշտոնական արդյունքները տարբերվում են էքզիթ փոլի տվյալներից, որոնց համաձայն՝ երկրորդ տեղում էր Լիբերալ պահպանողականների ներկայացուցիչ Ելենա Լասկոնին։ Նա զբաղեցրել է երրորդ հորիզոնականը:

Հավելենք, որ Քելին Ջորջեսկուն քննադատության էր ենթարկվել իր ռուսամետ հայտարարությունների, ինչպես նաև ՆԱՏՕ-ի և ԵՄ-ի հետ Ռումինիայի հարաբերությունների վերաբերյալ դիրքորոշման համար։ 2021 թվականին նա հայտարարել էր, որ Հյուսիսատլանտյան դաշինքը չի պաշտպանի իր անդամներից ոչ մեկին Ռուսաստանի հարձակման դեպքում, հիշեցնում է Reuters-ը։

Ջորջեսկուն նաև քննադատել է ԱՄՆ-ի ռազմական օգնությունն Ուկրաինային։

Թարգմանությունը՝ Տաթև Ֆռանգյանի