Քաղաքականություն
14.06.2023 | 17:15«Քաղաքացիական պայմանագիր» խմբակցության պատգամավոր Բաբկեն Թունյանն ԱԺ-Կառավարություն հարցուպատասխանի ընթացքում նշել է, որ անցյալ տարեվերջին Կառավարությունը մոտ 10 մլրդ դրամի չափով աջակցություն է տրամադրել ՏՏ ոլորտի մի շարք ընկերությունների այն հիմնավորմամբ, որ այդ ընկերությունները, որոնք հիմնականում աշխատում են արտերկրյա գնորդների հետ, տուժել են դրամի արժեւորումից:
Լրատվամիջոցներից մեկը հարցում է ուղարկել ԲՏԱ նախարարություն` ցանկանալով իմանալ` ո՞ր ընկերություններն են ստացել այդ աջակցությունը եւ յուրաքանչյուրը որքա՞ն աջակցություն է ստացել: Պատասխան է եկել, որ այդ տեղեկությունն առեւտրային գաղտնիք է:
«Հանրային միջոցներից տրվող աջակցությունը բյուջեի կատարողականի գումարների ծախսման արդյունավետության հետ կապված միջոցառումն ինչո՞ւ է համարվում առեւտրային գաղտնիք»,- դիմելով ԲՏԱ նախարար Ռոբերտ Խաչատրյանին, հարցրեց պատգամավորը։
«Լրատվամիջոցից ստացված հարցման բոլոր կետերին պատասխանել ենք, բացի այդ կետից: Մենք գրել էինք, որ չունենք ընկերությունների համաձայնությունը տվյալները բացահայտելու հետ կապված, քանի որ մեր մասնագիտական ստորաբաժանումների կողմից կարծիք էր տրվել, որ հնարավոր է` պարունակում է առևտրային գաղտնիք»,- պատասխանեց Խաչատրյանը:
«Ավելորդ աղմուկ ենք ստեղծում․ ստացվում է՝ թափանցիկություն չենք ապահովում»- ասաց Թունյանը՝ դիմելով ԲՏԱ նախարարին՝ հավելելով, որ այդ լրատվամիջոցը դատի է տվել ԲՏԱ նախարարությանը։
Մանրամասները` տեսանյութում:
