«Ապրելու երկիր» կուսակցությունը Երևանի քաղաքապետի թեկնածու կառաջադրի Մանե Թանդիլյանին

«Ապրելու երկիր» կուսակցությունը Երևանի քաղաքապետի առաջիկա ընտրություններում կառաջադրի կուսակցության հիմնադիր անդամ Մանե Թանդիլյանի թեկնածությունը։ Այս մասին այսօր ասուլիսում հայտարարեց «Ապրելու երկիր» կուսակցության խորհրդի անդամ Տիգրան Սահակյանը։

Թանդիլյանը իր ելույթում ընդգծեց, որ այս ընտրությունները դիտարկում են որպես իշխանափոխության արդյունավետ  միջոց․

«Մենք համարում ենք, որ ընտրությունների միջոցով և առանց ցնցում իշխանությունների փոփոխության կարիք կա երկրում։ Մենք դա արել ենք տարբեր համայնքներում, ապացուցել ենք, որ «Քաղաքացիական պայմանագիր» կուսակցության հետ որևէ համայնքում, որևէ ընտրությունների արդյունքում համագործակցության եզր չկա, առավել ևս չի լինելու Երևանում»,- նշեց Թանդիլյանը։

Մանե Թանդիլյանը 2017 թվականին «Ելք» դաշինքի ցուցակով ընտրվել է Հայաստանի 6-րդ գումարման Ազգային ժողովի պատգամավոր։

2018 թվականի մայիսից նոյեմբերը եղել է Հայաստանի աշխատանքի և սոցիալական հարցերի նախարար։

2018 դեկտեմբերին պատգամավոր է ընտրվել ռեյտնգային ընտրակարգով։ Եղել է Հայաստանի ԱԺ Ֆինանսավարկային և բյուջետային հարցերի մշտական հանձնաժողովի նախագահ։

2020 թվականի օգոստոսի 24-ին վայր է դրել պատգամավորական լիազորությունները։ 2020 թվականի դեկտեմբերից մինչև 2021 թվականի սեպտեմբեր զբաղեցրել է Արցախի Աշխատանքի, սոցիալական և միգրացիոն հարցերի նախարարի պաշտոնը։ 2021 թվականի օգոստոսի 15-ին Աշխատանքի և սոցիալական հարցերի նախկին նախարար Մեսրոպ Առաքելյանի հետ հիմնադրել է «Ապրելու երկիր» կուսակցությունը։