Քաղաքականություն
06.06.2023 | 21:32Բավականին ծանր և դաժան իրադարձություններ են տեղի ունենում Ուկրաինայում։ Կախովկա ՀԷԿ-ում պայթյունի հետևանքով սկսվել է հարյուրավոր բնակավայրերի տարհանման գործընթաց, հեղեղումներ են տեղի ունենում։ ՀԷԿ-ն անցյալ տարվա փետրվարի 24-ից գտնվում է ռուսական ուժերի վերահսկողության տակ։ Հենց նրանց էլ Կիևը մեղադրում է պայթեցման մեջ։
Հայ կառուցողական կուսակցության ղեկավար, քաղաքագետ Անդրիաս Ղուկասյանը Factor TV-ին տված հարցազրույցում նշում է, որ Ուկրաինան ուժեղ ռազմական բռունցք է ստեղծել և հարձակվելու է, ինչից մտավախություն ունի ՌԴ-ն, և ռուսական բանակը պայթեցրեց ՀԷԿ-ը։
«ՌԴ-ն ծայրահեղ վատ վիճակում է Ուկրաինայի դեմ պատերազմում․ ՀԷԿ-ի պայթեցումը վկայում է դա։ Ուկրաինայի դիվերսիոն հարվածները Կրեմլին խուճապ, լարվածություն են ստեղծում Ռուսաստանում, և մենք տեսնում ենք, որ այդպիսի մարտավարությամբ բացահայտվում է ՌԴ-ի պաշտպանությունը։ ՌԴ-ում ուկրաինական գործակալական մեծ ցանց կա՝ ամենազոր ԱԴԾ-ն անզոր է կանխել դիվերսիաները, անգամ Կրեմլին հարվածեցին։ Ես կարծում եմ, որ այսօր ՌԴ-ն կրակեց իր ոտքին՝ պայթեցնելով Կախովկա ՀԷԿ-ը։ Նա նաև քաղաքական սխալ է թույլ տվել՝ վերացնելով Ուկրաինայի ռուսալեզու հատվածը, որի վրա խաղադրույք էր արել։ Այդտեղ ապրող մարդիկ չունեն լոյալություն Կրեմլի նկատմամբ, թեև պատերազմից առաջ Ռուսաստանը կարծում էր, որ այդ հատվածներում ունի բացարձակ աջակցություն։ ՌԴ-ն ծայրահեղ վատ վիճակում է Ուկրաինայում, և պատերազմում այսօր առաջացած վիճակով կասեցվեց Միութենական պետության ընդլայնման գործընթացը»,- ասաց Անդրիաս Ղուկասյանը։
Հարցազրույցն ամբողջությամբ՝ տեսանյութում։
Ռոբերտ Անանյան
