Քաղաքականություն
04.06.2023 | 12:31
Թուրքիայի նախագահ Ռեջեփ Թայիփ Էրդողանը փոխել է կառավարության գրեթե ողջ կազմը, այդ թվում՝ արտաքին գործերի, պաշտպանության, ներքին գործերի և ֆինանսների նախարարներին․ հաղորդում է ՏԱՍՍ-ը։
Արտաքին գործերի նախարարության ղեկավար է նշանակվել հետախուզության պետ Հաքան Ֆիդանը, ով Ազգային հետախուզական կազմակերպությունը ղեկավարում էր 2010 թվականի մայիսից։
Ազգային պաշտպանության նախարարությունը կղեկավարի գեներալ Յաշար Գյուլերը, ով զբաղեցնում էր Գլխավոր շտաբի պետի պաշտոնը։
Ներքին գործերի նախարարության ղեկավարը լինելու է Ստամբուլի նահանգապետ Ալի Երլիքայան, որը Ստամբուլի նահանգապետն էր 2018 թվականից, իսկ մինչ այդ ղեկավարել է Գազիանթեփ նահանգը։
Մեհմեթ Շիմշեքը որպես ֆինանսների նախարար հրավիրվել է զբաղվելու երկրի տնտեսության բարդ իրավիճակով։ Նա այս պաշտոնն արդեն զբաղեցրել է 2009-2015 թվականներին, իսկ նախկինում եղել է տնտեսական հարցերով պետական նախարար (2007-2009 թթ.):
