15.12.2025 | 21:51
Ռուսաստանում Pussy Riot խումբը հայտարարվել է «ծայրահեղական կազմակերպություն»
Բլինքենը Թուրքիային կոչ է արել անհապաղ ավարտին հասցնել Շվեդիայի՝ ՆԱՏՕ-ին անդամակցությունը
Քաղաքականություն
31.05.2023 | 11:57
ԱՄՆ պետքարտուղար Էնթոնի Բլինքենը կոչ է արել Թուրքիային անհապաղ ավատին հասցնել Շվեդիայի՝ ՆԱՏՕ-ին անդամակցելու գործընթացը՝ ընդգծելով, որ Ստոկհոլմն արդեն նշանակալի քայլեր է արել իր անդամակցության հետ կապված Անկարայի առարկությունները լուծելու համար, գրում է Gercek news-ը՝ վկայակոչելով Reuters-ին։
Բլինքենը նաև մերժել է այն ենթադրությունը, որ Բայդենի վարչակազմը Թուրքիայի կողմից ՆԱՏՕ-ին Շվեդիայի անդամակցության հաստատումը կապում է Անկարային F-16 կործանիչներ վաճառելու հետ, թեև նա ասել էր, որ ԱՄՆ Կոնգրեսը դա է անում:
Հավելենք, որ ԱՄՆ նախագահ Ջո Բայդենը Թուրքիայի նախագահ Ռեջեփ Էրդողանի հետ հեռախոսազրույցից հետո լրագրողներին ասել էր․ «Նա դեռ ցանկանում է աշխատել F-16-ների վրա: Ես ասացի նրան, որ մենք ուզում ենք գործարքը Շվեդիայի հետ, ուստի՝ եկեք դա ավարտենք»։
Ելույթ ունենալով Շվեդիայի վարչապետի հետ Շվեդիայի հյուսիսում գտնվող Լուլեա քաղաքում կայացած համատեղ մամուլի ասուլիսում, Բլինքենն ասել է, որ Վաշինգտոնը պատրաստվում է շարունակել աշխատել Ստոկհոլմի անդամակցությունն ավարտելու ուղղությամբ՝ հուլիսի կեսերին ՆԱՏՕ-ի գագաթնաժողովին ընդառաջ։
«Մենք հավատում ենք, որ այժմ ժամանակն է, և առաջ չգնալու պատճառ չկա։ Թուրքիան բարձրացրել է կարևոր և օրինական մտահոգություններ: Շվեդիան և Ֆինլանդիան երկուսն էլ անդրադարձել են այդ մտահոգություններին։ Մենք անհամբեր սպասում ենք, որ այս գործընթացը կավարտվի առաջիկա շաբաթների ընթացքում: Մենք կասկած չունենք, որ դա կարող է լինել, և դա պետք է լինի, և մենք ակնկալում ենք, որ դա կլինի», – ասել է Բլինքենը։
Թուրքիան վավերացրել է Ֆինլանդիայի՝ ՆԱՏՕ-ն անդամակցության հայտը մարտի վերջին, սակայն դեռ հրաժարվում է հաստատել Շվեդիայի հայտը։
Էմմա Չոբանյան
