18.12.2025 | 23:24
ՀՀ տարածքում ավտոճանապարհները հիմնականում անցանելի են
Աշոտ Փաշինյանի միջադեպի գործը մակագրվել է դատավոր Մանվել Շահվերդյանին
Հասարակություն
30.05.2023 | 11:14
Վարչապետ Նիկոլ Փաշինյանի որդու՝ Աշոտ Փաշինյանի և զոհված զինծառայող Ժորա Մարտիրոսյանի՝ Ազգուշ Մարտիրոսյանի (հայտնի է որպեսա Գայանե Հակոբյան) միջև տեղի ունեցած միջադեպի գործը մակագրվել է դատավոր Մանվել Շահվերդյանին։ Այս մասին տեղեկանում ենք Դատալեքս դատական-տեղեկատվական համակարգից։ Ըստ համակարգում առկա տվյալների՝ գործը դատարան է ուղարկվել երեկ։
Ըստ մեղադրանքի՝ Ազգուշ Ռուբիկի Մարտիրոսյանը ՀՀ վարչապետ Նիկոլ Փաշինյանի պետական և քաղաքական գործունեության հետ կապված առևանգել է վերջինիս որդուն՝ Աշոտ Նիկոլի Փաշինյանին: Մարտիրոսյանի նկատմամբ խափանման միջոց է ընտրված կալանավորումը։
Հիշեցնենք, որ Աշոտ Փաշինյանը մայիսի 17-ին իրավապահներին հայտնել է, որ Վերաքննիչ դատարանի դիմացով անցնելիս է եղել, երբ հանդիպել է 2020 թվականի պատերազմի ժամանակ զոհված զինծառայողների ծնողներին, որոնցից մի կին մոտեցել է իրեն, առաջարկել նստել մոտակայքում կայանված իր ավտոմեքենան, որպեսզի կարողանան հանգիստ զրուցել: Ըստ իրավապահների հաղորդագրության՝ երբ Աշոտ Փաշինյանը նստել է մեքենան, կինը սկսել է այն վարել, ապա խոսել է 2020թ․ պատերազմից, տարածքային ու մարդկային կորուստներից, և տեսնելով, որ վերջինս դրսևորում է ոչ ադեկվատ վարքագիծ, երթևեկում է արագությունը գերազանցելով՝ երթևեկության կանոնների խախտմամբ, պահանջել կանգնեցնել ավտոմեքենան, որպեսզի ինքն իջնի: Կինն ասել է, որ իր տղային առանց իրեն հարցնելու տարել և սպանել են, ինքը կորցնելու ոչինչ չունի, կարող է նրան սպանել, ուստի առանց հարցնելու իրեն տանում է Եռաբլուր, որտեղ, իր էմոցիաներից ելնելով, կորոշի՝ ազատ թողնել, թե՝ ոչ: Համացանցում տարածվել է տեսանյութ, որում երևում է, որ Աշոտ Փաշինյանը մեքենայից դուրս է նետվում։
Ազգուշ Մարտիրոսյանը, սակայն, իրավապահներին հայտնել է, որ ինքը պարզապես ցանկանում էր Եռաբլուր տանել Փաշինյանին, նրա պաշտպանների պնդմամբ էլ՝ Մարտիրոսյանի արարքում հանցակազմ չկա։
Արաքս Մամուլյան
