18.12.2025 | 20:43
Հրդեհ Հայկաձոր գյուղում. այրվել է մոտ 1800 հակ անասնակեր
Բայրամովը Հայաստանի հետ հարաբերությունների կարգավորման հարցը քննարկել է ԵԱՀԿ ԽՎ նախագահի հետ
Քաղաքականություն
24.05.2023 | 17:18
Ադրբեջանի արտգործնախարար Ջեյհուն Բայրամովը Բաքվում ընդունել է ԵԱՀԿ Խորհրդարանական վեհաժողովի նախագահ Մարգարետա Սեդերֆելտին և նրան տեղեկացրել հայ-ադրբեջանական հարաբերությունների կարգավորման շուրջ ստեղծված իրավիճակի մասին։
Ադրբեջանի ԱԳՆ հաղորդագրության համաձայն՝ Բայրամովը տեղեկացրել է Հարավային Կովկասում իրավիճակի մասին, Ադրբեջանի կողմից « տարածաշրջանում խաղաղության ու կայունության ապահովման համար ձեռնարկվող քայլերի», այդ թվում՝ խաղաղության պայմանագրի ստորագրման, հաղորդակցությունների բացման մասին։ Նա բողոքել է, որ Հայաստանը, իբր, «սադրանքներ է իրականացնում ու փորձում դանդաղեցնել գործընթացները»։
«Հանդիպմանը քննարկվել են նաև ԵԱՀԿ ԽՎ-ում Ադրբեջանի հետ համագործակցության հեռանկարները և օրակարգային հիմնական հարցերը, ԵԱՀԿ ԽՎ-ի հնարավոր ներդրումը Ադրբեջանի և Հայաստանի միջև հարաբերությունների կարգավորման գործընթացում»,- ասվում է հաղորդագրության մեջ։
Սեդերֆելտն իր հերթին խոսել է նախօրեին Բաքվի կողմից Կովսական կազմակերպված քարոզչական այցի մասին։ Նա նաև նշել է, որ ԵԱՀԿ ԽՎ-ն նպաստում է խաղաղությանը, կայունությանը, խորհրդարանական դիվանագիտությանը և աշխատում է տարածաշրջանում խաղաղության հաստատման ուղղությամբ։
Հավելենք, որ նախօրեին էլ Սեդերֆելտի պատվիրակությունը հանդիպել էր Ադրբեջանի նախագահ Իլհամ Ալիևին։
Էմմա Չոբանյան
