16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Թուրքիայի քաղաքներում ոստիկանական շրջայցեր են․ լրագրողներ, քաղաքական գործիչներ են ձերբակալվել
Քաղաքականություն
23.05.2023 | 22:10
Թուրքիայում 28 մարդ, այդ թվում՝ քաղաքական գործիչներ, համայնքների ղեկավարներ, լրագրողներ և երաժիշտներ, ձերբակալվել են վաղ առավոտյան հինգ քաղաքներում իրականացված ոստիկանական շրջայցերի ժամանակ՝ սոցիալական ցանցերում գրառումներ անելու և բանտարկյալներին գումար ուղարկելու համար, գրում է Gercek news-ը։
Նշվում է, որ Մերսինի Գլխավոր դատախազությունը հետաքննություն է սկսել սոցցանցերում հրապարակումների և բանտարկյալներին դրամական փոխանցումների մասին պնդումների վերաբերյալ՝ Չուկուրովա բանտարկյալների ընտանիքների աջակցության ասոցիացիայի (Cukurova TUAY-DER) միջոցով: Վաղ առավոտյան ոստիկանությունը գործողություններ է իրականացրել Մերսինի, Անկարայի, Անթալիայի, Ադանայի և Իզմիրի տարբեր հասցեներում՝ շարունակվող հետաքննության շրջանակում:
Ձերբակալվածների թվում է Cukurova TUAY-DER-ի մենեջեր Սելիմ Էքինջին։
«Մեզոպոտամիա» գործակալության (MA) թղթակից Դելալ Աքյուզն էլ ձերբակալվել է Իզմիրում խուզարկությունների ժամանակ։ Առավոտյան վաղ ժամերին զինվորներն ու ոստիկանները խուզարկություններ են իրականացրել նաև Մարդին նահանգի Նուսայբին և Քըզըլթեփե շրջանների բազմաթիվ տներում։
Նուսայբինիում գործողության ընթացքում ձերբակալվել են քրդամետ HDP կուսակցության այդ շրջանի նախկին համանախագահ Սիյար Քոչը, գյուղապետ Ֆարիս Ալաքը և Ֆիրաթ Դեմիրը։
Հավելենք, որ Դիարբեքիրի Գլխավոր դատախազության կողմից անցկացված հետաքննության ընթացքում ապրիլի 25-ին 21 քաղաքներում խուզարկությունների ժամանակ բերման է ենթարկվել 191 մարդ, ավելի քան 50 մարդ, այդ թվում՝ լրագրողներ և փաստաբաններ, կալանավորվել են։
Էմմա Չոբանյան
