08.04.2026 | 22:00
ԵՏՄ-ում մնալը ձեռնտու է՝ ՀՀ-ին շահավետ գործարք է․ ԵՄ-ում չենք ունենա տնտեսական նման կարողություններ․ Մանե Թանդիլյան. ՏԵՍԱՆՅՈՒԹ
Պեսկովը հույս է հայտնել, որ Մոսկվայում Հայաստանի և Ադրբեջանի ղեկավարների հանդիպումն արդյունավետ կլինի
Քաղաքականություն
23.05.2023 | 17:36
Կրեմլը հույս ունի, որ մայիսի 25-ին Մոսկվայում կայանալիք Ադրբեջանի և Հայաստանի ղեկավարներ Իլհամ Ալիևի և Նիկոլ Փաշինյանի հանդիպումներն արդյունավետ կլինեն։ Այս մասին ադրբեջանական Report-ի հետ զրույցում ասել է ՌԴ նախագահի մամուլի խոսնակ Դմիտրի Պեսկովը։
«Հինգշաբթի այստեղ կլինեն և՛ նախագահ Ալիևը, և՛ վարչապետ Փաշինյանը։ Մենք ակնկալում ենք, որ շփումներ կլինեն մեր նախագահի հետ։ Այդ շփումների նախապատրաստական աշխատանքներն ընթանում են և, իհարկե, մենք կցանկանայինք հույս ունենալ արդյունքների վրա։ Ինչ աստիճանի արդյունավետություն կլինի՝ ժամանակը ցույց կտա»,- ասել է Պեսկովը։
Հավելենք, որ Ալիևը հրավիրված է Մոսկվայում մասնակցելու ԵՏՄ միջոցառումներին, այն դեպքում, երբ Ադրբեջանն այդ կառույցի անդամ չէ։
«Հաջորդ շաբաթ մենք իսկապես կզբաղվենք եվրասիական ինտեգրման հարցերով։ Լինելու են և՛ Եվրասիական տնտեսական համաժողովը, և՛ Եվրասիական տնտեսական բարձրագույն խորհրդի նիստը Մոսկվայում։ Մենք հուսով ենք, որ Ադրբեջանի նախագահ Իլհամ Ալիևն ու Հայաստանի վարչապետ Նիկոլ Փաշինյանը կլինեն Մոսկվայում։ Հնարավոր շփումների մասին ժամանակին կտեղեկացնենք»,- ավելի վաղ հայտարարել էր Պեսկովը։
Նշենք, որ մայիսի 17-ին էլ Ադրբեջանի նախագահ Իլհամ Ալիևը Բաքվում ընդունել էր Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչին՝ քննարկելով միության հետ համագործակցության հարցերը։
Էմմա Չոբանյան
