04.11.2024 | 22:30
Հայաստանի մի շարք հասցեներում էլեկտրաէներգիայի անջատումներ կլինեն
Լեհաստանում առեղծվածային առարկա է ընկել շենքի վրա՝ մեծ անցք առաջացնելով տանիքին
Քաղաքականություն
23.05.2023 | 15:40
Լեհաստանի Ռակով քաղաքում անհայտ մետաղական առարկան ընկել է բնակելի շենքի վրա։ Այս մասին հայտնում է RFM 24 ռադիոկայանը։
Նշվում է, որ դեպքը տեղի է ունեցել ապրիլի 4-ին, տուժածներ չկան։ Առարկան լուրջ վնաս է հասցրել տանիքին, ճեղքել է այն ու ընկել ձեղնահարկի հատակին։
«Տանիքում այնպիսի անցք կար, կարծես ինչ-որ ռումբ է այն առաջացրել՝ մոտ 70 սմ էր»,- պատմել է վնասված տան բնակիչը։
Նա ձեղնահարկի հատվածում հայտնաբերել է «երկաթե շրջանակ», որն ընկելիս կիսով չափ կոտրվել է։ Բեկորները կշռել են ավելի քան 4 կգ։
Միջադեպի մասին հայտնել են իրավապահներին, գործը հետաքննում է Կոնին քաղաքի դատախազությունը։
Քննիչները կապ են հաստատել քաղաքացիական և ռազմական ավիացիայի միջադեպերը հետաքննող ծառայությունների հետ, սակայն նրանք չեն հաստատել, որ օբյեկտը եղել է ինքնաթիռի մաս:
Դատախազությունը դիմել է նաև Լեհաստանի օդային ծառայությունների գործակալության օգնությանը։ Պարզվել է, որ այն պահին, երբ օբյեկտը ճեղքել է տանիքը, Ռակովի վրայով ինքնաթիռ է թռել դեպի Իռլանդիա։ Տեխնիկական բրիգադները ստուգել են ինքնաթիռը, բայց պարզվել է, որ այն ամբողջական է եղել։
Այժմ դիտարկվում է վարկած, որ օբյեկտը կարող է լինել գյուղատնտեսական մեքենայի մաս։ Բեկորները նույնականացնելու համար նշանակվել է փորձաքննություն։
Տաթև Ֆռանգյան
