Ընտրություններին ընդառաջ Էրդողանը պատմել է Պուտինի հետ հատուկ հարաբերությունների մասին

Թուրքիան «հատուկ և աճող» հարաբերություններ ունի Ռուսաստանի նախագահ Վլադիմիր Պուտինի հետ՝ չնայած Անկարայի վրա ճնշումներին, որպեսզի օգնի ուժեղացնել արևմտյան պատժամիջոցները Մոսկվայի դեմ։ Այս մասին Թուրքիայի նախագահ Ռեջեփ Թայիփ Էրդողանն ասել է հաջորդ շաբաթ կայանալիք նախագահական ընտրությունների երկրորդ փուլին ընդառաջ CNN-ին տված հարցազրույցում։

«Մենք այն կետում չենք, որ Ռուսաստանի դեմ պատժամիջոցներ կիրառենք, ինչպես արեց Արևմուտքը։ Մենք կապված չենք Արևմուտքի պատժամիջոցներով։ Մենք ուժեղ պետություն ենք և դրական հարաբերություններ ունենք Ռուսաստանի հետ։ Ռուսաստանն ու Թուրքիան միմյանց կարիքն ունեն բոլոր հնարավոր ոլորտներում։ Արևմուտքն այնքան էլ հավասարակշռված մոտեցում չի ցուցաբերում։ Ձեզ անհրաժեշտ է հավասարակշռված մոտեցում այնպիսի երկրի նկատմամբ, ինչպիսին Ռուսաստանն է, ինչը շատ ավելի հաջող մոտեցում կլիներ»,- ասել է Էրդողանը։

Խոսելով հացահատիկային գործարքի և այն երկու ամսով երկարացնելու մասին՝ Թուրքիայի նախագահը դրա հաջողությունը կապել է ՌԴ-ի նախագահ հետ լավ հարաբերությունների հետ։

«Դա հնարավոր է եղել նախագահ Պուտինի հետ մեր հատուկ հարաբերությունների շնորհիվ»,- նշել է Էրդողանը։

CNN-ին տված հարցազրույցում Էրդողանն անդրադարձել է նաև Արևմուտքի հետ թուրքական լարվածության ևս մեկ կարևոր կետի՝ ՆԱՏՕ-ին Շվեդիայի անդամակցության խնդրին։ ՆԱՏՕ-ի՝ մեծությամբ երկրորդ բանակն ունեցող Թուրքիան արգելափակել է Ստոկհոլմի անդամակցությունը դաշինքին՝ մեղադրելով նրան արգելված Քուրդիստանի աշխատավորական կուսակցության (PKK) զինյալներին ապաստան տալու մեջ:

«Քանի դեռ Շվեդիան շարունակում է թույլ տալ Թուրքիայում ահաբեկչական խմբավորումների ճյուղերին ազատ շրջել Ստոկհոլմի փողոցներում, մենք չենք կարող բարեհաճորեն նայել ՆԱՏՕ-ին Շվեդիայի անդամակցությանը։ Մենք հիմա պատրաստ չենք դրան»,- ասել է Թուրքիայի նախագահը։

Էմմա Չոբանյան