Հասարակություն
19.05.2023 | 14:44Զոհված զինծառայողների ծնողներին պետք է շատ զգույշ և մեծ ուշադրությամբ վերաբերվել։ Այս մասին այսօր ԱԺ-ում լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանը՝ ընդգծելով, որ անթույլատրելի է այդ ծնողների զգացմունքներն օգտագործել քաղաքական նպատակներով, և դա պետք է բացառել։
«Որևէ երեխա չպետք է պատասխանատվության ենթարկվի իր ծնողների արարքների համար: Հակառակը, այո, ինչ-որ տեղ ծնողը պատասխանատու է իր երեխայի դաստիարակության համար։
Զավակներից չի կարելի պատասխանատվություն պահանջել ծնողների արարքների համար, դա վտանգավոր տեղ կտանի, ով ուզում ես եղիր։ Եթե մեկը երեխային ասում է՝ գնանք, ցույց տամ՛ ծնողդ ինչ է արել, պետք է ասել՝ դու էլ երեխա ունես․․․
Ցանկացած քաղաքացի իրավունք ունի դժգոհություն հայտնել իշխանությունների գործողություններից, բայց հաշվեհարդարի կոչերը մեր հասարակությանը կարող են ուրիշ տեղ տանել․․․
Սա քաղաքական պայքարի այլասերված դրսևորման հետևանք է, հասարակության մեջ միասնականության բացակայության հետևանք։ Մարդիկ, որոնք տասնյակ տարիներ թունավորել են երկրի հասարակական-քաղաքական կյանքը, շարունակում են դա անել»,- նշեց պատգամավորը։
Խաչատրյանը հավելեց, որ տպավորություն ունի, թե Հայաստանում կան ուժեր, որոնք հրաման են ստացել երկրում քաղաքացիական պատերազմ հրահրել։ «Ես դա տեսնում եմ։ Ես լավ ճանաչում եմ այս մարդկանց, վաղուց եմ ճանաչում նրանց։ Այս մարդիկ ամեն գնով պատրաստ են իշխանության գալ՝ արյուն թափել, կրակել, հեղաշրջում անել»,- նշեց պատգամավորը։
Հիշեցնենք, որ երեկ՝ մայիսի 17-ին «Հայկական ժամանակը» տեղեկություն էր տարածել, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Ըստ թերթի` զոհված զինծառայողների ծնողները ստիպել են Աշոտ Փաշինյանին նստել իրենց մեքենան, սակայն նրան հաջողվել է դուրս նետվել մի պահ կանգ առած մեքենայից, ինչի հետևանքով նրան վրաերթի է ենթարկել հետևից ընթացող մեքենայի կողմից, որում եղել են նույն կազմակերպության անդամներ։
Աշոտ Փաշինյանը դեպքի առնչությամբ հաղորդում է ներկայացրել: Քննչական կոմիտեում նախաձեռնվել է քրեական վարույթ՝ մարդուն առևանգելու հոդվածով, ձերբակալվել է մեկ անձ` Գայանե Հակոբյանը։
Մանրամասները՝ տեսանյութում։
