18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
ԵՄ-ն հաստատել է երրորդ երկրների դեմ պատժամիջոցների ծրագրերը, որոնք օգնում են ՌԴ-ին ապրանքների մատակարարման հարցում
Քաղաքականություն
16.05.2023 | 15:03
Եվրահանձնաժողովի նախագահ Ուրսուլա ֆոն դեր Լեյենը հաստատել է, որ Ռուսաստանի դեմ պատժամիջոցների նոր փաթեթը կպարունակի միջոցներ երրորդ երկրների դեմ, որոնք օգնում են ՌԴ-ին պատերազմ վարել Ուկրաինայի դեմ, գրում է Euronews-ը։
Ըստ ֆոն դեր Լեյենի՝ Եվրահանձնաժողովի կողմից պատրաստված միջոցները, ըստ էության, «նախազգուշացում են, որ մենք լրջորեն ենք վերաբերվում մեր պատժամիջոցներին, որ մենք կարող ենք արգելել արտահանել որոշ ապրանքներ երրորդ երկրներ, եթե կան հստակ ապացույցներ, որ դա պատժամիջոցների շրջանցում է և դեպի Ռուսաստան մատակարարումներ»։
«Մենք տեսնում ենք, որ կա անհամապատասխանություն այն ամենի միջև, ինչ սկսվում է Եվրամիությունից, տարանցումով անցնում է Ռուսաստանով, այնուհետև հայտնվում է երրորդ երկրում: Եվ հետևաբար, մենք որպես զսպող միջոց քննարկում ենք այն հարցը՝ արդյո՞ք պետք է լինի նման տարանցման արգելք»,- բացատրել է նա։
Եվրահանձնաժողովի ղեկավարը չի հստակեցրել, թե ինչպես է աշխատելու այս մեխանիզմը, միայն նշել է, որ խոսքը «մի քանի անցակետերի» մասին է, որոնք կպահպանեն սահմանափակումները։
Նա նաև հավելել է, որ պատժամիջոցների նոր փաթեթը կարող է ընդլայնել ԵՄ ապրանքների ցանկը, որոնք արգելված են Ռուսաստանի տարածքով տարանցման համար։
Հիշեցնենք, որ ավելի վաղ հաղորդվում էր, որ Եվրամիությունից ավելի քան մեկ միլիարդ եվրո արժողությամբ ապրանքներն «անհետացել» են՝ Ռուսաստանի տարածքով դեպի Հայաստան, Ղազախստան և Ղրղզստան վերջնական հասցեատերերին տարանցման ճանապարհին։ Խոսքը, այսպես կոչված, երկակի նշանակության ապրանքների մասին է, որոնք արգելված է արտահանել Ռուսաստան՝ Ուկրաինա ռուսական զինված ներխուժման ֆոնին Մոսկվայի դեմ սահմանված պատժամիջոցների պատճառով։
Տաթև Ֆռանգյան
