Կարող է 500 շենք հենց էնպես կանգնի և մարդիկ փողեր կորցնեն․ Պապոյանը՝ կառուցապատման մասին․ ՏԵՍԱՆՅՈՒԹ

ԱԺ ֆինանսավարկային և բյուջետային հարցերի մշտական հանձնաժողովի նիստում այսօր քննարկվեց Հայաստանի հանրապետության կենտրոնական բանկի գործունեության վերաբերյալ տարեկան հաղորդումը:

ԿԲ նախագահի տեղակալ Արմեն Նուրբեկյանը ներկայացնելով հարցը՝ նշեց, որ 2022-ին ԿԲ-ի գերխնդիրը եղել է գնաճի զսպումը, ինչի վրա արտաքին միջավայրը մեծ ազդեցություն է ունենում: Աշխարհում թեև այժմ գնաճը նվազման միտում ունի, բայց բարձր մակարդակը դեռ պահպանվում է և վաղ է ասել, որ այդ խնդիրը հաղթահարվել է: ՀՀ-ի համար 2022-ի տնտեսական տարին, ըստ ԿԲ փոխնախագահի, եղել է արտահանման և արտաքին առևտրի պահանջարկի աճի տարի: ԿԲ-ն խստացրել է իր դրամավարկային քաղաքականությունը՝ տոկոսադրույքի որոշումներով, բայց շատ խստացումներ չի արել, քանի որ փոխարժեքով է պայմանավորված եղել արտահանումը և արտաքին առևտուրն ու գնաճը:

ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը դրական է գնահատելով ԿԲ-ի հաշվետվությունը՝ առաջարկեց օրենսդրորեն կարգավորել կառուցապատման հետ կապված առկա խնդիրները՝ այս ոլորտում հնարավոր ճգնաժամից խուսափելու համար :

ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը խոսել է շինարարության ոլորտի խնդիրներից, կիսվել մտահոգություններով: «Մեզանում առկա է ստանդարտների խնդիր: Այդ հարցը պետք է լուծվի, քանի որ յուրաքանչյուր ստանդարտ իր հետ ռիսկեր է նվազեցնում»,- շեշտել է հանձնաժողովի նախագահը:

«2-3 հարյուր հազար դոլար ունեցող մարդը 2-3 միլիոնանոց շենքում ներդրում է անում. սա շատ վտանգավոր բան է եւ մենք իրավունք չունենք գայթակղվել դրանով»,- հիփոթեքային շուկայի մասին ասաց հանձնաժողովի նախագահ Գեւորգ Պապոյանը՝ նկատելով, որ նախադեպերն ունեցել ենք, որից ամենացցունը 1990-ականներին էր, երբ տնտեսական ցնցումների արդյունքում 15-16-17 թաղամասերում, միանգամից 500 շենքի շինարարություն կանգնեց եւ հազարավոր մարդիկ գումարներ կորցրեցին:

Մանրամասները՝ տեսանյութում։