24.11.2024 | 21:16
Հայաստանի բասկետբոլի հավաքականը պարտվեց Ավստրիայի թիմին
Փաշինյանը որոշել է՝ ՊՆ-ի, ԱԱԾ-ի, ՆԳՆ-ի, ՊՊԾ-ի, ՊԵԿ-ի և ՔԿ-ի աշխատակիցները ռազմամարզական մրցումների կմասնակցեն․ բյուջեից շուրջ 50 մլն դրամ կհատկացվի
Քաղաքականություն
11.05.2023 | 10:44
Նիկոլ Փաշինյանը որոշել է, որ ՊՆ-ի, ԱԱԾ-ի, Ոստիկանության, Փրկարար ծառայության, ՊՊԾ-ի, ՊԵԿ-ի, Քննչական կոմիտեի և Գլխավոր դատախազության աշխատակիցները պետք է թիմեր ձևավորեն և մրցեն ռազմամարզական խաղերում՝ ըստ իրենց մարզաձևերի: Որոշում կայացվել է Փաշինյանի մասնակցությամբ 2022 թվականի հունվարի 17-ին ՀՀ պաշտպանության նախարարությունում անցկացված խորհրդակցության ժամանակ։ Factor.am-ն այս մասին տեղեկանում է ՀՀ ԿԳՄՍ նախարարության որոշման նախագծից։
«Ռազմամարզական խաղերի մրցաձևերը ընտրվել են հաշվի առնելով, որ Հայաստանի Հանրապետության զինված ուժերում յուրաքանչյուր տարի այդ մրցաձևերից անցկացվում են մրցումներ և այդ մրցաձևերով Հայաստանի Հանրապետության զինված ուժերը մասնակցում են նաև միջազգային մրցաշարերի՝ մասնավորապես ԱՊՀ մանակից պետությունների պաշտպանության նախարարներին կից մարզական խորհրդի, ինչպես նաև ռազմական սպորտի միջազգային խորհրդի (CISM) կողմից կազմակերպվող առաջնություններին»,-կարդում ենք նախագծի հիմնավորման բաժնում: Նշվում է նաև՝ սա կնպաստի, որ այս կառույցների աշխատակիցները լինեն առողջ և ապրեն երկար։
Այս մարզական մրցումներն անցկացնելու համար ՀՀ կառավարության պահուստային ֆոնդից կհատկացվի 49 մլն 723 հազար 170 դրամ։ Այս մրցումներն անցկացվելու են 2023 թվականի օգոստոսի 20-ից 27-ը, Դիլիջանի «Մ․Մելքոնյանի անվան ռազմամարզական վարժարան» հիմնադրամի և ՀՀ պաշտպանության նախարարության մարզաբազաներում: ՊՆ-ի, ՊԵԿ-ի, ԱԱԾ-ի, ՊՊԾ-ի, ՔԿ-ի և Գլխավոր դատախազության աշխատակիցները ուժերը կփորձեն ռազմամարզական քառամարտ, ռազմականացված կրոսավազք, կողմնորոշում և հրաձգություն մարզաձևերում։
Նարեկ Կիրակոսյան
