«Ազով» գնդի հիմնադիրը հայտնել է Ուկրաինայի ԶՈՒ-ի կողմից Բախմուտի մոտ ռուսական երկու վաշտի ջախջախման մասին

Ուկրաինայի զինված ուժերը Դոնեցկի մարզի Բախմուտի մերձակայքում ջախջախել են ՌԴ ցամաքային զորքերի 72-րդ բրիգադի ստորաբաժանումները։ Այս մասին հայտարարել է «Ազով» գնդի հիմնադիր, «Ազգային կորպուս» կուսակցության առաջնորդ Անդրեյ Բիլեցկին, գրում է Meduza-ն։

«Ուկրաինայի զինված ուժերի երրորդ առանձին գրոհային բրիգադի հարձակողական գործողությունների արդյունքում ՌԴ 72-րդ բրիգադի ստորաբաժանումները ջախջախվել են։ Փաստացիորեն այս բրիգադի 6-րդ և 8-րդ վաշտերն ամբողջությամբ ոչնչացվել են»,- ասել է Բիլեցկին Telegram-ում հրապարակված տեսանյութում:

Նա, սակայն, իր խոսքերը հաստատող ապացույցներ չի ներկայացրել։ Բիլեցկիի խոսքով՝ «կոտրվել է բրիգադի հետախուզությունը, ոչնչացվել է զգալի թվով զրահատեխնիկա, զգալի թվով գերիներ են գերեվարվել»։ Բացի այդ, նա պնդում է, որ «Վագներ» ռազմականացված խմբավորումը նույնպես մեծ կորուստներ է կրել։

Բիլեցկին նշել է, որ հարձակողական գործողություններ են իրականացվել 3 կիլոմետր լայնությամբ և 2,6 կիլոմետր խորությամբ։ Այժմ, ըստ նրա, այս տարածքն ազատագրվել է ռուսական ուժերից։

Ուկրաինայի Զինված ուժերի 3-րդ գրոհային բրիգադը սոցիալական ցանցերի իր էջերում տեսանյութ է հրապարակել, որը, բրիգադի պնդմամբ, նկարահանվել է Ռուսաստանի Դաշնության 72-րդ բրիգադի հետ մարտում։ Կադրերում երևում է, թե ինչպես են մի քանի զինվորներ փախչում զրահատեխնիկայից։ Ուկրաինայի զինված ուժերի գրոհային բրիգադը պնդում է, որ հինգ մարդ գերի է ընկել։

Ավելի վաղ «Վագներ»-ի հիմնադիր Եվգենի Պրիգոժինը հայտարարել էր, որ Ռուսաստանի Դաշնության 72-րդ բրիգադը մայիսի 9-ին փախել է Բախմուտի ռազմավարական դիրքից։

«Բոլորը փախան և մերկացրին ճակատը՝ գրեթե երկու կիլոմետր լայնությամբ և 500 մետր խորությամբ: Լավ է, որ մենք ինչ-որ կերպ արգելափակեցինք այն»,- ասել է Պրիգոժինը տեսաուղերձում:

Ռուսաստանի Դաշնության Պաշտպանության նախարարությունը դեռևս չի մեկնաբանել այս լուրերը։