Բարդ էր, բայց լավ էինք պատրաստվել․ Մալխաս Ամոյան․ ՏԵՍԱՆՅՈՒԹ

Մեկնարկել է հունահռոմեական ոճի ըմբշամարտի Հայաստանի հավաքականի գլխավոր մարզիչ Արմեն Բաբալարյանի, հունահռոմեական ոճի ըմբշամարտի Հայաստանի հավաքականի մարզիչ Սամվել Գևորգյանի, հունահռոմեական ոճի ըմբշամարտի Հայաստանի հավաքականի մարզիչ Գևորգ Ալեքսանյանի, Մալխաս Ամոյանի անձնական մարզիչ Ռոման Ամոյանի, Եվրոպայի 6-ակի չեմպիոն Արթուր Ալեքսանյանի, Եվրոպայի կրկնակի չեմպիոն Մալխաս Ամոյանի, Եվրոպայի առաջնության բրոնզե մեդալակիր Հրաչյա Պողոսյանի ասուլիսը՝ Խորվաթիայում կայացած հունահռոմեական ոճի ըմբշամարտի Եվրոպայի առաջնության արդյունքների ամփոփում թեմայով։

Հայաստանի հունահռոմեական ոճի ըմբշամարտի հավաքականի անդամ, աշխարհի և Եվրոպայի չեմպիոն Մալխաս Ամոյանի հիմնական նպատակը սեպտեմբերին կայանալիք աշխարհի առաջնությունում հաջողության հասնելն է:

Ասուլիսում Ամոյանը շեշտեց, որ եզրափակիչ գոտեմարտերն առավել ծանր են տրվում, բայց սերբ մրցակիցը լավ էր նախապատրաստվել, և ինքը գոհ չէ եզրափակիչ գոտեմարտում իր կատարած աշխատանքից․ «Ուրախ եմ, որ կարողացա Եվրոպայի առաջնության կրկնակի չեմպիոն դառնալ: Այս անգամ ամեն ինչ ավելի բարդ ստացվեց: Հաջողությունս կրկնել հաջողվեց լավ նախապատրաստվելու և մարզիչների հետ աշխատանքի շնորհիվ»։

«Եվրոպայի առաջնությունում այս հաղթանակը ինձ վստահություն է տալիս, որ գալիք մրցաշարերում առավել լավ պատրաստվեմ: Բացերս շատ են, պետք է կարողանամ մարզիչներիս հետ լրացնել, որ կարողանամ աշխարհի առաջնությանն ավելի լուրջ մոտենալ: Դեպի Փարիզ տանող ամենագլխավոր կետն աշխարհի առաջնությունն է»,-ընդգծեց մարզիկը:

Նշենք, որ Խորվաթիայի մայրաքաղաք Զագրեբում ապրիլի 20-23-ն անցկացված հունահռոմեական ոճի ըմբշամարտի Եվրոպայի առաջնությունում Արմեն Բաբալարյանի գլխավորած հավաքականը նվաճեց երկու ոսկե, մեկ բրոնզե մեդալներ: Ոսկե մեդալակիրներ դարձան Արթուր Ալեքսանյանը և Մալխաս Ամոյանը, բրոնզե մեդալակիր՝ Հրաչյա Պողոսյանը:

77 կգ քաշային կարգում Հայաստանի ներկայացուցիչ Մալխաս Ամոյանը եզրափակիչում մրցել էր սերբ Վիկտոր Նեմեսի հետ: Հայ ըմբիշը հաղթել էր 6:4 հաշվով: Մալխաս Ամոյանը աշխարհի չեմպիոն է։

Մանրամասները՝ տեսանյութում։