ՌԴ-ից հեռացած ընդդիմադիրները Բեռլինում համատեղ հռչակագիր են ընդունել

Ռուսաստանից հեռացած ռուս ընդդիմադիրներն ու ակտիվիստները նոր համատեղ հայտարարություն են տարածել։ Ապրիլի 30-ի երեկոյան ընդդիմության 68 ներկայացուցիչներ հրապարակավ ստորագրել են հռչակագիր, որում հայտարարել են իրենց հավատարմությունը սկզբունքային դիրքորոշումներին, որոնցից առաջինն Ուկրաինայի դեմ Ռուսաստանի պատերազմի հանցավոր բնույթն է, գրում է DW-ի ռուսական ծառայությունը։

«Ռուսական զորքերը պետք է դուրս բերվեն բոլոր օկուպացված տարածքներից: Ռուսաստանի միջազգայնորեն ճանաչված սահմանները պետք է վերականգնվեն, ռազմական հանցագործները պետք է պատասխանատվության ենթարկվեն, իսկ ագրեսիայի զոհերին պետք է փոխհատուցում տրվի»,- ասվում է Միխայիլ Խոդորկովսկու ֆեյսբուքյան էջում մայիսի 1-ին հրապարակված հայտարարության մեջ:

Բացի այդ, հռչակագիրը ՌԴ նախագահ Վլադիմիր Պուտինի ռեժիմը ճանաչում է որպես «ապօրինի և հանցավոր», որն այդ պատճառով «պետք է լուծարվի»։

«Մենք Ռուսաստանը դիտարկում ենք որպես երկիր, որտեղ երաշխավորված են անհատի իրավունքներն ու ազատությունները, որտեղ բացառված է պետական իշխանության յուրացման հնարավորությունը»,- ընդգծվում է փաստաթղթում։

Ակտիվիստները նաև մատնանշեցին «կայսերական քաղաքականության անթույլատրելիությունը ինչպես երկրի ներսում, այնպես էլ դրա սահմաններից դուրս»:

Փաստաթուղթը ստորագրողների թվում են վտարանդի քաղաքական գործիչներ Միխայիլ Խոդորկովսկին, Դմիտրի Գուդկովը, Իլյա Պոնոմարյովը և Լեոնիդ Գոզմանը, քաղաքագետներ Կիրիլ Ռոգովը, Իվան Պրեոբրաժենսկին և այլք։

Տաթև Ֆռանգյան