ՄԱԿ-ի գլխավոր քարտուղար Գուտերեշն իր տեղակալին ուղարկել է Սուդան

Սուդանում վատթարացող իրավիճակի ֆոնին ՄԱԿ-ի գլխավոր քարտուղար Անտոնիո Գուտերեշն իր տեղակալ, հումանիտար և արտակարգ իրավիճակների համակարգող Մարտին Գրիֆիթսին ուղարկել է աֆրիկյան այս երկիր։ Մայիսի 1-ի լույս երկուշաբթի գիշերը Twitter-ում գրել է ինքը՝ Գրիֆիթսը, փոխանցում է DW-ի ռուսական ծառայությունը։

«Խարթումում և ողջ Սուդանում բախումների բռնկումից երկու շաբաթ անց հումանիտար իրավիճակը հասել է իր սահմանագծին։ Անտոնիո Գուտերեշի խնդրանքով ես գնում եմ տարածաշրջան՝ գնահատելու, թե ինչպես կարող ենք անմիջապես մեղմել տուժած մարդկանց իրավիճակը»,- ասվում է գրառման մեջ։

Նույն օրը նման հայտարարություն է արել ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը։ «Սուդանում արագորեն վատթարացող հումանիտար ճգնաժամի լույսի ներքո ՄԱԿ-ի գլխավոր քարտուղարը շտապ կերպով տարածաշրջան է ուղարկում մարդասիրական հարցերով իր տեղակալ Մարտին Գրիֆիթսին: Կատարվողի մասշտաբներն ու արագությունը աննախադեպ են»,- ասել է Դյուժարիկը։ «Մենք չափազանց անհանգստացած ենք Սուդանի ժողովրդի և ամբողջ տարածաշրջանի վրա դրա ներկայիս և երկարաժամկետ ազդեցության համար»:

Ապրիլի 30-ին ՄԱԿ-ի Պարենի համաշխարհային ծրագիրը մտահոգություն է հայտնել, որ Սուդանում հումանիտար ճգնաժամը կարող է տարածվել Արևելյան Աֆրիկայի ողջ տարածաշրջանում, որն արդեն աղետալի վիճակի մեջ է կլիմայի փոփոխության պատճառով:
«Նույնիսկ այս երկրում կռիվներից առաջ բնակչության մեկ երրորդը տառապում էր սովից, իսկ այժմ այնտեղ ամեն ինչ պակասում է, իսկ պարենի գները կտրուկ բարձրանում են», – ասել է Գերմանիայի ՊՀԾ տնօրեն Մարտին Ֆրիկը։

Սուդանում շարունակվում են ռազմական գործողությունները գեներալ ալ-Բուրհանի բանակի ու գեներալ Դագալոյի ռազմականացված խմբավորման միջև Խարթումում ու Դարֆուր արևմտյան շրջանում։