16.12.2025 | 16:05
Մայր Աթոռի արձագանքը՝ պատարագների ընթացքում կաթողիկոսի անունը զեղչելուն
Խայտառակ վիճակ է, ամբողջ օրը մեքենա ենք սարքում. փոսային նորոգումներ՝ առանց զգուշացնող նշանների. ՏԵՍԱՆՅՈՒԹ
Քաղաքականություն
27.04.2023 | 20:30
Մայրաքաղաքի տարբեր ճանապարհներին ասֆալտի վնասված և նորոգվող հատվածները պատշաճ կահավորված չեն, չկան արագությունը սահմանափակող կամ ճանապարհաշինական աշխատանքների մասին զգուշացնող նշաններ։ Վարորդները դժգոհում են՝ տևական ժամանակ նույն վիճակն է, անգամ հաշիվն են կորցրել, թե այս փոսերի պատճառով քանի անգամ են վերանորորգման տարել մեքենաները։
«Ամբողջ օրը մեքենա ենք սարքում, խայտառակ վիճակ է, Երևանը սենց լքված երբևիցե չի եղել, չենք կարողանում շրջանցենք»,- նշեց վարորդներից մեկը:
Քաղաքապետարանի լրատվության վարչությունից Factor TV-ին ասացին՝ ամբողջ քաղաքում փոսեր են գոյացել, չէին կարող բոլորի դիմաց կամ խաչմերուկներին զգուշացնող նշաններ տեղադրել։
Բայց վարորդներն այսօր մեզ հետ զրույցում հակադարձում էին՝ այդ փոսերի պատճառով հաճախ նաև վթարներ են լինում, իրենք էլ ականատես են լինում:
«Բա էսքան վթար որտե՞ղից է լինում, չի հաջողվում շրջանցել»,- ասաց վարորդներից մեկը:
Քաղաքապետարանի լրատվության վարչությունից ասում են՝ եղանակային վատ պայմաններ են, հիմա չեն կարող նորոգել, ուզում են որակով աշխատանք անել, իսկ դրա համար կայուն եղանակ պետք է լինի։ Վթարներից էլ են տեղյակ, բայց ասում են՝ ի՞նչ անեն, քաղաքապետարանի աշխատակիցներն էլ են այդ նույն ճանապարհներով երթևեկում։ Խոստանում են՝ բարենպաստ եղանակի դեպքում փոսերն արագ կլցնեն, մի քանի օրվա հարց է: Բայց ի՞նչ անեն փոսերի պատճառով վթարի ենթարկվողները կամ մեքենան վնասողները․ այս հարցի պատասխանն այդպես էլ չկա:
Մանրամասները՝ տեսանյութում:
Արփի Հակոբյան
