05.11.2024 | 14:50
Վրաստանում 30 տեղամասերում ընտրությունների արդյունքները չեղարկվել են
Ֆրանսիայում հակակառավարական ցույցերը չեն հանդարտվում․ Մակրոնը հայտարարել է, որ պետք է առաջ շարժվել
Քաղաքականություն
21.04.2023 | 17:43
Ֆրանսիայում կենսաթոշակային բարեփոխումներից դժգոհ հազարավոր մարդիկ շարունակում են դուրս գալ փողոց։ Փարիզում մի խումբ ցուցարարներ ներխուժել են Euronext բորսայական օպերատորի շենք։ Լիոնում գործադուլ անող երկաթուղայիններն էլ ներխուժել են SNCF՝ պետական տրանսպորտային ընկերության գրասենյակներ, գրում է Euronews-ը։
Աշխատանքի կոնֆեդերացիայի առաջնորդ Սոֆի Բինեն Գարդանում տեղի ունեցած հանրահավաքում կրկին կոչ է արել ֆրանսիացիներին մայիսի 1-ին դուրս գալ բողոքի ցույցերի։
«Մայիսի 1 կլինի աննախադեպ, բացառիկ մոբիլիզացիայի օր։ Աննախադեպ, քանի որ սա առաջին անգամ է, երբ բոլոր արհմիութենական կազմակերպությունները կոչ են արել մայիսի 1-ին ցույցի դուրս գալ։ Այնպես որ՝ սա լինելու է միասնական ու ժողովրդական մոբիլիզացիայի օր»,- հայտարարել է Բինեն։
Մինչ այդ Ֆրանսիայի նախագահ Էմանուել Մակրոնը այցելել է շրջաններ։ Գանժ քաղաքում նրան ցույցերով են դիմավորել։
«Նորմալ է, որ զայրույթ է արտահայտվում, սակայն մենք պետք է շարունակենք առաջ շարժվել»,- հայտարարել է նախագահ Մակրոնը։
Հիշեցնենք, որ ավելի վաղ Ֆրանսիայի նախագահ Էմանուել Մակրոնը հեռուստատեսային ուղերձում հայտարարել էր երկիրը միավորելու, այսպես կոչված, «100 օրվա ծրագիրը» իրականացնելու մտադրության մասին։ Այս ծրագրի շրջանակներում Ֆրանսիայի վարչապետ Էլիզաբեթ Բորնը պետք է առաջարկներ պատրաստի աշխատանքային պայմանների, անվտանգության, կրթության և առողջության վերաբերյալ, ասել է նա։ Մակրոնի խոսքով՝ այս աշխատանքի արդյունքները պետք է տեսանելի լինեն հուլիսի 14-ին՝ Բաստիլի գրավման օրվա տոնին։
Տաթև Ֆռանգյան
