Հարցումները ցույց են տալիս, որ Թուրքիայում նախագահ կընտրվի երկրորդ փուլով

Թուրքիայի նախագահական ընտրությունների վերաբերյալ  վերջին երկու հարցումները ցույց են տալիս, որ  կարող է անցկացվել ընտրությունների երկրորդ փուլ, քանի որ ոչ նախագահ Ռեջեփ Թայիփ Էրդողանը, ոչ նրա հիմնական մրցակից Քեմալ Քըլըչդարօղլուն չեն ապահովում  ձայների ավելի քան 50 տոկոսը, գրում է Bianet-ը։

Aksoy ընկերությունը ապրիլի 1-ից 8-ն ընկած ժամանակահատվածում հարցում է անցկացրել 1067 մարդու շրջանում։ Արդյունքում Քըլըչդարօղլուն ստացել է ձայների 47,8 տոկոսը, իսկ Էրդողանը՝ 38,4 տոկոսը։ Մուհարեմ Ինջեն, ով 2018 թվականի ընտրություններում առաջադրվել է որպես Ժողովրդահանրապետական կուսակցության  թեկնածու, ստացել է ձայների 9 տոկոսը, իսկ ծայրահեղ աջակողմյան թեկնածու Սինան Օղանը հավաքել է 4,8 տոկոս։

Մինչդեռ MAK ընկերությունը ապրիլի 10-16-ը հարցում է անցկացրել 5750 մարդու մասնակցությամբ 52 նահանգներում, որից պարզվում է, որ Քըլըչդարօղլուն ստացել է ձայների 47,8 տոկոսը, Էրդողանը՝ 43,7 տոկոսը, Մուհարեմ Ինջեն՝ 3,4 տոկոսը, իսկ Սինան Օղանը՝ 4 տոկոսը։

Եթե թեկնածուներից ոչ մեկին չհաջողվի ապահովել ձայների 50 տոկոսից ավելին, առաջին փուլից երկու շաբաթ անց կանցկացվի երկրորդ փուլը։

Երկու հարցումներն էլ ցույց են տալիս, որ ընտրությունների՝ առաջին փուլով չավարտվելու պատճառ է հանդիսանում երկու կողմնակի թեկնածուների՝ Ինջեի և Օղանի առկայությունը, որոնք հիմնականում ձայներ են խլում Քըլըչդարօղլուից։ Եթե նախագահական ընտրություններն անցնեն երկրորդ փուլ, ապա խորհրդարանական ընտրությունների արդյունքը վճռորոշ կլինի, քանի որ առավելություն կունենա այն թեկնածուն, ում կուսակցությունը ստանա մեծամասնություն։

Թուրքիայում խորհրդարանական ու նախագահական ընտրությունները տեղի են ունենալու մայիսի 14-ին։

Էմմա Չոբանյան