20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Հովիկ Աբրահամյանի նկատմամբ խափանման միջոց է ընտրվել բացակայելու արգելքը
Հասարակություն
18.04.2023 | 18:03
ՀՀ նախկին վարչապետ Հովիկ Աբրահամյանին մեղադրանք է ներկայացվել, նրա նկատմամբ խափանման միջոց է ընտրվել բացակայելու արգելքը։ Այս մասին տեղեկությունը Factor.am-ին հաստատեցին Հակակոռուպցիոն կոմիտեից։
Հիշեցնենք, որ այսօր ավելի վաղ Դատախազությունը հայտարարություն է տարածել այն մասին, որ որոշում է կայացվել հանրային քրեական հետապնդում հարուցել Արբահամյանի նկատմամբ։
ՀՀ նախկին վարչապետն, ըստ մեղադրանքի, 2006 թվականից մինչև 2016 թվականի սեպտեմբերի 8-ն ընկած ժամանակահատվածում հանդիսանալով հանրային պաշտոն զբաղեցնող պաշտոնատար անձ, անցել է պաշտոնեական լիազորությունները, ինչպես նաև ձեռնարկատիրական գործունեություն իրականացնելու արգելքին հակառակ՝ վստահված անձանց միջոցով մասնակցել է ավազի արդյունահանմամբ զբաղվող «Ավազահատիկ» ՍՊ ընկերության կառավարմանը՝ օրինականացնելով դրա արդյունքում հանցավոր ճանապարհով ստացված առանձնապես խոշոր չափերով գույքերը։
Ըստ գործի՝ օրինականացվել է հանցավոր ճանապարհով ստացված առանձնապես խոշոր չափերի՝ 230 մլն 400 հազար դրամը: Հսկող դատախազը որոշում է կայացրել Հ.Ա.-ի նկատմամբ 18.03.2003 թվականին ընդունված ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով (պաշտոնեական դիրքն օգտագործելով՝ հանցավոր ճանապարհով ստացված առանձնապես խոշոր չափերով գույքն օրինականացնելը (փողերի լվացումը)), 309-րդ հոդվածի 1-ին մասով (պաշտոնեական լիազորություններն անցնելը) և 310-րդ հոդվածով (ձեռնարկատիրական գործունեությանն ապօրինի մասնակցելը) հանրային քրեական հետապնդում հարուցելու մասին:
Արաքս Մամուլյան
